[dropcap]С[/dropcap]ентябрь зурул 25-нний Къизилюртуллал райондалий­сса Хъанардал шяраву хьунни Совет Союзрал Виричу, лакрал миллатрал къучагъсса арс ХIажи Бугъановлун 100 шин шаврин хас дурсса мероприятияртту.

[dropcap]Ш[/dropcap]икку гьуртту хьун бувкIун бия Лакрал ва ЦIуссалакрал районнаясса делегацияртту, Къизилюртуллал райондалул администрациялул, Аьрали коми­ссариатрал, Ветерантурал совет­рал, РОВД-лул вакилтал, виричунал гъан-маччами. Мажлис байбивхьуна ХIажи Бугъановлул цIанийсса Султанянгиюртуллал 2-мур школалий (Хъанардал). ДакIнийн бутан, Султанянгиюртуллал 2-мур школа тIивтIуну бур 2011 шинал, 2013 шинал школалун дирзун дур ХIажи Бугъановлул цIа.|

2015 шинал, Буттал КIанттул цIанийсса Хъунмасса дяъвилий Ххувшаву ларсун 70-шин бартлаглагисса гьантрай школалул хIаятраву дацIан дурну дур Виричунал гьайкал ва мура чIумал школалий тIивтIуну бур ванал цIанийсса тарихрал ва буттал улча лахьхьаврил музей.
Виричунал юбилейрал мажлис тIитIлай, ихтилат бувна ХIа­жи Бугъановлул аьпа абад баврил фондрал председатель, мунал гъанчу Давуд Бугъановлул. Ванал бувсунни Бугъановхъал ххаллилсса кулпатрая, ХIажи ХIусмановичлул оьрмулия ва аьра­ли ххуллурдая.

ДакIний личIансса ихтилат­ру бувна Лакрал райондалул бакIчи Юсуп МахIаммадовлул, ЦIуссалакрал райондалул бакI­чинал хъиривчу Аьвдурашид Бу­ттаевлул, «Дагестан» ГТРК-лул директорнал хъиривчу Ссалам Хавчаевлул, Гъумучиял школалул директор Ххадижат ХIусниевал, Хъанардал школалул директор Шамил Аьвдулахидовлул, вава школалул учительница Индира Оьмаровал ва мукунма цайминналгу.

Цала каялувшиву дуллалисса республикалул ТОКС-рал штаб­рал чулуха барчагу бувну, Ссалам Хавчаевлул увкуна: «Да­гъусттаннай бур 60-ннийн бив­сса Совет Союзрал Вирттал. Ттула пишалуцIун бавхIуну на хьунаавкьуссара миннава сайки ба­чIиннащал. КIул хьуссара на ХIажи Бугъановлущалгу. Ванаяр уздансса, пахру-ххара бакъа­сса инсан ттун цама къаккавкссар. Ва хасият хIисав шайва циняв­ппагу Вирттавраву. Вайннан ххирая цайминнал къучагъшивур­ттая кьакъабагьавай буслан, цаява ихтилат буллалийни ламус буллан бикIайва. Укунсса ия Бугъановгу. Ххаллилсса музей сакин бувну бур зу школалий. ХIажи ХIусмановичлул оьрмулия кIул бансса цикссагу затру уттигу бу­ссар, щак бакъар, зу хъирив лавну, къабавмургу аьлтту банссар тIисса. Нагу пикрилий ура зул кумаграцIух ХIажи Бугъановлул 100 шинан хасну ххаллилсса передача дуван».
Виричунал гъанчу Айгунов Саид буслай ия цува ХIажи Бу­гъановлул чIявуну цащала уцай­сса ивкIшиву.

— Ттун хъама къабитай на чIи­висса чIумал цинявннан ва увчI­лай, ваначIан гъан хъанай хIурматру буллан бикIайва. ХIажи Бугъанов Харковьрал Медициналул институтрал хъунама преподавательну зузисса чIумал на ваначIан лавгссияв. Хъинну асар хьуна, институт­рал жанахIраву хъунисса «мусил» хIарпирдай дурсса, «шикку Совет Союзрал Виричу ХIажи Бугъанов зий уссар» тIисса чичру.

Ихтилатру къуртал хьуну махъ, Хъанардал школалул дуклаки оьрчIал дур­ккунни назмурду, увкунни балайрду. Ххаллилсса аьрали композиция ккаккан бунни шадлугърайн бувкIсса Гъумучиял школалул дуклаки оьрчIал.
Цинявннал дирхьунни тIутIив школалул хIаятравусса ХIажи Бугъановлул гьайкалданучIа, рирщунни дакIний личIансса суратру, ххал бунни школалий­сса Бугъановлул цIанийсса музей. Шиккува кIицI бан, Индира Оьма­ровал каялувшиннаралусса ва музейрал гьашину шамилчин­сса кIану бувгьуну бур республикалул музейрдал дянив.

Хъирив цинявппа лавгунни Виричунал гьаттайн. ХIажи Бу­гъанов увччуну ия Хъанардал шяраву, дяъвилий жанну дуллуминнан дацIан дурсса гьайкалданучIа.
Шикку оьрмулул бугьараминнал бувккунни Кьулгьу-алхIам, дунни дуаьрду, цIунилгу хьунни Виричу дакIнийн утлатисса ихтилатру.
— Укун къучагъсса талатала ттун тачIав хьуна къаавкьу­ссар. ЗахIматсса, чIярусса щавурду дирну махъгу, ччяни кьюкьлувун занагу хьуну, яла къизгъинмий талатавурттаву гьуртту шай­ссия. Ванал батальонгу цахара лар­хьхьусса нигь-ццахь бакъасса дия, тIисса полкрал командирнал махъру кIицI бунни цала ихтилат­раву Юсуп МахIаммадовлул.

ХIажи Бугъановлул гъан-маччаминнал дакIнихтунусса барчаллагь увкунни ванал аьпа­лул мажлисрай гьуртту хьун бувкIминнахь, ва даву дузрайн дуккан дан ка-кумаг бувминнахь, чIарав бавцIуминнахь. Цинявппагу ихтилат буллалими бия, утти жува вай вирттаврая гъалгъа тIийнма личIаннав, жунма тачIав дяъвилул чIу къабаяннав тIий.
Шиккугу виричунал гьав тIутIавун дахьлаган дунни. Ванал савлугъран дуклаки оьрчIал итабавкьунни гьаваллавун 100 ятIулсса шар.

Ахирданий цинявппа бав­тIунни «Раян» тIисса залдануву тIивтIусса авадансса ссупралухун. Шиккумур мажлисрал сий гьаз дунни Лакрал театрданул артистътурал.
Андриана Аьбдуллаева,
Имара Саидова.