Гьашину ляличIину баргъ-гъарагъи даркьусса шин дур зунттаву. Уртту-тIутIивгу аргъирай дур. Машаллагь! Амма вай гьантрай, зунттавун аьрххи багьну, чIу-чIитI бакъасса кIанттурдайн ияйхту, дакIнивун пашманшиву дурххуна. ХьхьичIава зунттаву бивкIсса яттил, чIируннал мя-гъя, къушлийсса ккаччал хIап бухлавгун бия.
Совет заманнай жул ЧIяйннал Виричу ЦIаххуй Маккаевлул цIасса колхозрал буссия яттил мукьва къуш, ттизайсса оьллал кIира газу, курчIу ризкьилулгу кIира газу. Миннул чIюлу дувайва зунттавусса тIабиаьт чIукIрайну, чIалачIаврийну. Буссия ЧIяйннал шярава яттичIа хIухчалтну: АхIмадов Мюрщи, ХIайдаров ХIасанхIусайн, Ибрагьимов Апанни, Кудуров ХIусман, Оьмаров Рамазан, Рабаданов Аьлихан, ХIанапиев МахIа, Ажупов ХIасанхIусайн ва цаймигу. Аьпалувух бивхьунни цинявппагу.
Ца яттикъуш ва ттизайсса оьллал газу гъинттул лагайссия ссурхIиял дазуйсса Аьралалу тIисса мащилийн. Ца ятти-къуш бищайссия Хъусращиял шяраваллил кIихсса Аьралиялу тIисса зунттуй, цагу – Барта-БакIуй. ЯттичIа бикIайва ссурхIиял хIухчалтгу. Ятту ттивзусса накIлия дурсса нисирал колхозрал склад буцIин байссия. Утти иттах дукканнагу яттил нис ххал къашай.
Ца ххуллух, аранная яттугу зунттавунмай бувкIун махъ, июнь зуруй, Барта-БакIул ухнилу ятту ттизлай бивкIун бур хIухчалт. Кумагран шярава бувкIсса жагьилталгу бивкIун бур. Му диркIун дур Буттал кIанттул цIанийсса дяъви байбишин хьхьичIсса шин. Ттардая, чIиру дар бувну, хIухчалт ттарду ттизлай бивкIун бур. ЧIиругу ратIнил тия чулийсса суннайх буруган бувну бивкIун бур. Тия чIиру, шия ттарду мя-гъя тIий бивкIун бур. Сундарав буссар ЯтIул Мурлу тIисса хъинну лахъсса мурлу. Тана та муруллул кьабакIравун цачIун хьусса чIируннава ца чIи ххявххун бур муруллийх ялавай.
Гаймигу бавчуну бур ганил хъирив ххяхлай. Къушлийсса хIухчалт бан-бит бухлавгун, а-а бавхъун бивкIун бур. Яла, муруллийх ялавай ххявхсса чIиру чапур къахьун, бихлан хъирив хьуну бур. Хъунмасса хIал къавхьуну, ца жагьил, зирангну ратIгу лархъун, ххяллавух лавай авчуну ур. ЧIалай ивкIун ур га, оьрмулия ка ларсун, чIиру ххассал буван шайрив ххал бан най ушиву. Ца дакьикьалул дянив муруллул бакIрайн ивну, ахьния ххяххан нанисса чIигу хъап куну бувгьуну, махъунай авчуну ур. Ахьния ххяхлахисса чIиругу га чIилул хъирив бавчуну бур. ЧIиру ххассал бувсса жагьилгу ивкIун ур Ибрагьимов Илияс. Мукун Илияслуща бювхъуну бур 700-800 чIи ххассал бан. ЛивтIуссагу хьуну бур биялсса. Илияслул дурсса виричушиврия МахIачкъалалийн Обком партиялийн баян бувну, гила ХIурматрал грамота ва багьлул ххирасса бахшиш дуркIун диркIссар.
Ватандалийн душман ххявххукун, хьхьичIа-хьхьичIминнавух лавгссар Илияс чапхунчи ххит уллан. Занагу хьуссар, орденнал ва медаллал хъазам бувцIуну. Укунсса виричушивуртту дурсса жагьилтал ЧIяйннал шяраву чIявусса буссия.
Ттун учин ччимур вари. БачIва хьуну бур Лаккуйсса зунттурду. Къутаннай гьашину къурагъшиву дуну, цала ятту бувцуну увкIунни зунттавун колхозраву хъунмасса захIмат бувсса Рамазаннул арс Оьмаров Оьмар. Цала буттал цимилгу ккуччу бувсса бизанттайх занай, чурххан малхIан хъанай бухьунссар Оьмардунгу. Кабакьиннав вицIун, Оьмар!
Мукунма хъунмасса барчаллагь кIа Дугъул-БакIуй захIмат буллалисса, цала хъунбуттал ХIанапиев Аьлиллул пиша язи бувгьусса ХIанапиев КьурбанмахIаммадлунгу, та ЯтIувахъ захIмат буллалисса Ибрагьимов Шамиллунгу, кIа Шалавсса Ибрагьимовхъангу. Зу, зунмавагу къакIулну, дуллалиссару багьа бищун къашайсса даву. Ябуллалиссару Лакку билаят.
Чан къахьуннав зунттава ятту-гъаттарал мя-гъа ва ккаччил хIап!
Арсен Аьбдуллаев,
ш. ЧIяйми
