[dropcap]Ф[/dropcap]азил Дашлай Ростовуллал областьрай яхъанахъисса дагъусттанчу ур, РутIуллаясса. Ва цувагу шаэр, таржумачи ур. Хъундяъвилий ятIа-тIар бакъа ливтIуминнал бакIрачIан бувкIсса кьадарданул хъирив агьну, чIявусса фронтовиктурал цIарду ашкара дурну дур ванал.
«Дон аьрщарай ливтIусса дагъусттанлувтал», «ЦIуртти бакъасса вирттал», «Махъва-махъсса батальон» (РутIуллал райондалиясса фронтовиктурал) ва
цаймигу луттирдал автор ур ва ЯтIа-тIар бакъаминнавух цIарду диркIсса вирттаврал бакIрачIан бувкIмур батIлай, салкьи буллай, лу итабакьин дакIний усса ур цувагу.
Дашлай Фазиллул Ккуллал райондалиятусса фронтовиктурал сияхI гьан дурну дур жулва лакрал цIанихсса душ Миясат МуслимовачIан, ванил маслихIатрайн бувну, жугу ва сияхI кказитрай ришлай буру. Жун пикри хьунни сияхI дусса куццуй оьрус мазрайра рищун, документирттайсса гъалатIругу бакьин къабувну. Документирттай гъалатIру бивкIшивурхха тай чIуннардий жунна ххирану дарцIусса. Масалдаран, ттул буттауссил цIа дурагу дакъассар аьрай ливтIуминнавух.
Архиврдавусса документирттай «Лакейский район, селение Первая Цурке, Ромазанов Ромазан» тIий чивчуну лявкъуну тIий, буттауссил бакIрачIан бувкIмургу так 90-ку шиннардий кIул буван бювхъунутIий, Подольскалийсса архиврдайн запросру гьан дуллай. ТIисса мура, гъалатIру сававну, чIярусса цIарду ашкара дуван къархьунура лирчIссар. Фазиллул захIматгу жува барчаллагьрай кьамул буван аьркинссар.
Бюхъай вай архиврал документирттал орфография ядуваврил цIусса затру ялун личин бувангу, уттинин къакIулну бивкIмур кIул бувангу.
Фазил Дашлай Лакралмур райондалул сияхIрахагу зий ур, чIявусса аьралийтурал бакIрачIан бувкIмур кIул бувну бур. Архиврал документру низамрайн буцайхту, Лакралмур райондалул сияхIгу бюхъайссар рищун жула кказитрай. Бусияра зугу зулами пикрирду ва иширал хIакъиравусса.
Гьаннайсса, дяъвилул диян дурсса щавурду дурар ттигу щаллуну хъин хьун.
П. Рамазанова
