Дагъусттаннал БакIчинал кIанттайсса Владимир Васильевлул август зурул 20-нний хьусса мажлисрай гьаз бунни агьамсса масъалартту.
Шамиллул райондалийсса «Спартак» тIисса лагерьданий 90 инсан, миннавух 86 оьрчI, инжит хьуну, азарханардайн агьсса иширал хъирив лаллай, Дагъусттаннал цIуллу-сагъшиву дуруччаврил министр Жамалуттин ХIажиибрагьимовлул бувсунни дурсса анализирттал ккаккан бувшиву оьрчIру отравить шаврил савав аьнакIул дикIуву ляркъусса салманелла душиву, ми Ставрополлаясса дикI душиву.
Бувсунни райондалул азарханалул хъунама хIакин даврия укьан увшиву, хIакьинусса кьинигу 19 инсан азарханардайва бушиву, ми азарханардай лахъи лаглагаврил сававгу чIумуй багьайкунсса медициналул кумаг къабаву душиву. Республикалул Роспотребнадзорданул хъунмур Элеонора Оьмариевалгу бувсунни аьнакIул дикI, Ставрополлайсса производительтурачIату тIайла хьуну, ххал дигьлагьисса хъиривлаяву дуршиву, кIицI лавгсса лагерьданул пищеблокрал санитар кьараллу дагьайкун къадурурччуну ляркъушиву, материаллу низам дуруччай структурарттайн дуллушиву ва лирчIмур продукциягу экьиличинтIишиву.
Роспотребнадзорданул хъунмунил лагерь цIуницIа зузи бансса ихтияр дулаврил хIакъиравугу Владимир Васильевлул дакIнийн бувтунни гьашину оьрчIал кьува лагерь тIитIин къавхьушиву, тIалавшиннарду щаллу къадурну тIий, кIицI лавгсса лагерь ялагу цинярда тIалавшиннарду щаллу дурсса лагерь бивкIшиву, му цIуницIа зузи бансса ихтияр дуллалишиву, кьянкьасса тIалавшиннардугу дурну.
«Лагерьду лакьлан жунма лавхьхьунни, амма оьрчIру багьайкун бигьалагансса шартIру дузал дуван ттигу къалавхьхьунни, инсантурал цIуллу-сагъшиврия бухьувкун ихтилат, даву сантирай, магьирну дуллан аьркинссару», — увкунни В. Васильевлул.
Туризмалул министр Рабият Закавовал бувсунни «Мусил бакIурду (дюны)» ва «Мусил къун» тIисса проектирттал даву цукун най дуссарив. Ванил бувсунни «Мусил къун» тIисса проектрал лагрулийн бувну къуртал бувшиву ххюра зивулийса корпус ва арулла зивулийссагу буллай бушиву. Владимир Васильевлул бувсунни, турист проектру бартдигьайхту, зузи кIанттурдугу хьунтIишиву.
