«Ина сукку хьула, та кIанай ца чIивисса ттучан бувансса гьану бизлай»

[dropcap]А[/dropcap]ьрасатнаву Строительнал кьини кIицI лагай август зурул кIилчинмур алхIаткьини, гьашину му хъанай дур август зурул 12-мур кьини.Ва строительствалул аралуву зузисса гьарманал профессионал байранни.

 

[dropcap]А[/dropcap]ьрасатнаву аьмну строительствалул дунияллий зий бусса бур мукьва миллион инсантурал. Къачанни! Ва ялагу, строительствалул комплексравун дагьлагьисса цимурцагу билаятрал экономикалул агьам­сса ца къярттар. Строительтурахь цIуххинмургу, миннал жухьва бусанмургу мудан къачанссар. ХIакьинусса ттул ихтилат ЦIуссаккулув хъуна хьу­сса, 1-мур ЦIувкIратусса Шагьабуттиннул арс ХIажикьурбанов Сайдуннущалли. Ва Дагъус­ттаннал лайкь хьусса строительли, мукьцIалла шин хьуну дур ванал ва аралуву зий, биялсса опыт бур. ЦIанакул зий ур «Архитектура строительства и дизайна» тIисса идаралул хъунаманугу, «СвойДом» тIисса строительтурал компаниялул директорнугу.

— Сайдун, цIанакул ина чIяру зивурдайсса къат­ри дуллай урав, ссаха зий ура?
— Цалчинмур МахIачкъалалив, Новостройрайн нани хху­л­лий, Каммаевлул цIанийсса кIичIираву 10 зивулийсса къат­ри дуллай буссар жул идара. Гьалмахчунал миннат бувна вай къатри къуртал дуван бакIрайн ласи куну, ласун багьунни, хъунмур чIунгу вайннуха зий гьан дувара.
— Найбунува булунна цIанакул биялсса аваза бувтсса тагьардануцIун бавхIусса суал: ина дуллалисса къатри низамрал тIалавшиннарайн бувну дуллалиссарив? ЧIярусса, цIуну дурсса ва дуллалисса къатри лекьан дувантIиссар тIисса хавардал ва тIардал агьалинал дакIру гьулусан дунни, хIатта митингирттайнгума був­ккунни.
— На, хъинну хъирив лавну, документру ххал бувара ссаха-унугу зуннин, щак-щуклийсса кIантту бухьурча, мукунсса объектир­ттая махъаллил шара. МукьцIалла шинай ва даврий зузисса ттун къакIулну дикIайссарив проектирттал, документирттал хIал­кьазия. Лекьан буван аьркин­ссар тIисса къатрал масъалагу къабагьавай гьаз буллалисса ба­къар. Документру шанна зивулийсса къатри дувансса бухьурчагу, подвалли, мансардар тIий, ххюра зивулийн кIункIу хьуну ля­къай. Бур мунихава лавхьхьу­сса цайми-цаймигу кIанттурду. Амма циняв къатри хьхьара­сса, багьайкун цIакьну къабувсса бур учингу къахьунссар. Документру бакъанува бувминнувугу ххуйссагу бур. Бур къабагьайний був­ссагу. Къатри лекьан баврил заралгу, зий, захIмат буллай, думур салкьи дурну, квартира машан ласунсса хIарачат бувминнан хьун най бур. Къия мудангу хъузалай, зузалай дур. Тахсирмур бур ми къатри дуван­сса ихтияр дуллусса идарарттай, архитектуралул ва строительствалул масъалартталсса буллалисса структурарттай. Ина су­кку хьула та кIанай ца чIивисса ттучан буван гьанурду буклай. Гъан хьун къабитантIиссара! Арулла-мяйра, ягу ххюра зивурдайсса къатри тIайла дакъа дуваннин ми идарартту чун бурувгун бивкIссар, циван бивтссар? Ми лекьан дувангу дуцири арцу харж дуван багьантIиссар, чIаравминнун зарал къахьунну, агьалинал мюхчаншиву дурурччуну лекьан дуван аьркин­ссар, къабигьассар. Утти­гъанну сакин бунни ми масъалартталсса буллантIисса Градостроительствалул комитет. Му комитетрай бурж бивхьуссар даву низамрайн рутан. Сайки дачIи шинал мутталий цIусса къатри-объектру дувансса ихтияр къадуллуссар щихьхьунчIавгу, Ма­хIач­къалалив хьхьичIра дулла­лими давурттив бакIуйн ду­ккан дуллайри зий буссагу. Бур строительствалул даву цаппара хIаллайсса дара-дацIан дуван­сса хаваргу, дагьайкун низам дишиннин. Так му къадагъалул, мунийн мораторий учай, квартирардал багьри хъиннува гьаз буван ххай ура.

— Гьакссания ххирану бур. МахIачкъалалив сайки Москавуллал къирагърайсса кунма­сса багьри бур тIий бур. ЗучIа, масалдаран, ссан дур квад­ратрал метр?
— Лувми зивурдай 23-25 азаруннин квадрат дур, ялувминнуй – 20 азаруннин.

— Ми бур зума-къирагъ­райсса багьри. Шагьрулул дянив тIурча, 45-50 азаруннин квадрат дур. Циванни вакссара ххирасса?
— Коррупция сававнугур. Застройщикнан дуллалисса къат­равун газ буцин, щинаххуллурдалсса, ттукIралсса буван мадарасса арцу дулун багьлай бушивугур. На кьатIаллил билаят­райгу зий ивкIра, цайми регионнаясса строительтуращалгу дахIаву дур, амма жучIара куннасса гъургъаза чувчIав дакъар. Цайми регионнай, аьрщигу ларсун, низамрай къатри дуллалинахун ахчайсса акъар, къатравун газ, ттукI буцаву, щин дуцаву низамрал ххуллийсса дур, жучIара чиновниктурал цанна аьркинмур дукканшиврулсса дайшишрурду дур.
— Новостройкартту хIат-хIисав дакъасса дур, къат­ри дуллалисса компанияртту, гьарза хъанарча дакъа, чан хъанай да­къар.
— Квартирарду машан ласлай буну тIийри. Зунттаву ялапар хъанахъими оьрчIан шагьрурдай квартирарду ласлай бур, республикалул кьатIушав лавгмигу, зана къахьурчагума, Дагъусттаннай цив­ппа заллусса магъи ччай бур. На дуллалисса къатраву квартирарду ласлай шама инсан ур Къазахъисттаннаясса.

— Хьхьирил зуманицIсса коттеджругу лекьан бан­сса хIукму бунни судрал. ЧIяру зивурдайсса къат­рал заллухъру ахIвалат къаавадансса агьлу бухьурча, коттеджиртталми заллухъру чиновниктал, давлатлувтал бур. Инсанталгу миннайн ссибувцIуну, чIявуми му хIукмулий рязисса бур. Вилмур пикри?
— Ттун ккаккай ми коттеджру, агьалинал рязи бакъашивугу хъунмурчIин чиновниктурал ми хIукуматрал арцуцIух бувссар тIисса дур. Мукун бухьурча, ми лекьан къабуллай, агьали гъинттул бигьалагай­сса санаторияртту, оьрчIансса гъинтнил лагерьду бан бучIия. Шлагбаумругу дуркьун, хьхьирил зуманичIансса ххуллурду илкин буван аьркинссар, хьхьири – агьалинал хъусри, амма му хIакьину каши дунал хъус хъанай бур, коттеджирттал заллухъруннал ххуллу бавхIуну бур, хьхьирия цивппа неъмат ласласаву гьану. Жагьилсса кулпатирттан къатри ласун кумаг буллалисса кабакьаву дакъар хIукуматрал.

— Ипотека?
— Ца му ипотека дур. Амма мугу бигьасса зат дакъар. КьатIаллил билаятирттай жагьилсса кулпатирттан къатри дувансса участокру дуллай бур, чан-чанну тIий лахъаву дувансса арцу дуллай бур къатри ласун, ялун ххи къадуллай. Инсантурай дакIцIуцIаву дусса политика дур гьар аралуву. Совет заманнай строительствалуха зузисса идарарттай проектирдалсса, планналсса, гьарзатрал­сса буллалисса пишакартал бу­ссия, утти аьркинсса минахурталвалгу кьамул буван ччай бакъар, миннан харж къабулланшиврул, вилния опыт бур, вилва опытрайн чул бивщуну, инава урувгун дува тIий бур. Хъунисса идарарттал дуван багьайсса давурттив хъуни да­къасса фирмардал дуллай бур. Дунияллул строительствалул стандартирттал тIалавшиннардайн бувну къадурсса дур, уку-тукун дурсса дур тIийгу бур яла.

— Шагьрулул архитектура, диц-куц лащинсса даражалийсса душиву инкар бан къашайсса зат бур. Ци буван аьркинссар тагьаргу, шагьрулул чIалачIингу ххуй дуван? Кув бур МахIачкъалаллал чIалачIин утти ххуй дуллай дуван къашайссар, шагьру цамур кIанай цIунил буварча бакъа, пайда бакъассар тIий.
— Шагьрулул хъунаману зун аьркинссар инженер-строитель. Цувагу даврил опыт бусса! Строительнан кунна шагьрулул инфраструктура, цимурцаннул хIалкьазия щинчIав къакIулссар. Му бигьасса даву дакъассар, ххуйсса минахурталгу лагма лаган бувну, низамрайн рутанну даву тIисса ниятрай къуццу тIурча, хIасиллугу жува ххари бувансса дикIантIиссар.

— Сайдун, дакIнихтуну барча тIий буру вихь Строи­тельнал кьини! Зул даву, буниялттунгу, агьалинан бусравсса даву дур, садикру, школартту, поликлиникартту, азарханарду, агьали яхъанансса къатри…Строительнал даврил кьадру хъунма­ссар. Зу цIуллу баннав!

— Барчаллагь! Сант дагьну дунура, нагу барча буллай ура пишалул уртакьтал. Ттун мяйжаннугу ххирар ттулла даву, гъирарай зийгу ивкIра, ттигу зий ура. Нара дурсса къатрал чIарах нанийни, тай къатраву чIявусса кулпатру яхъанай буссархха тIисса ххарисса асардал дакI дуцIай. Ттуща кьянкьану нара дурсса гьарцагу даврил жаваб дулунгу хьун­ссар, нава даву дагьайкун дуллай ивкIунтIий, инсантурай дакI аьтIий зий ивкIунтIий.

Ихтилат бувссар
ПатIимат Рамазановал