[dropcap]Л[/dropcap]аргсса итникьини Дагъусттаннал БакIчинал къуллугъ чIумуйну биттур буллалисса Владимир Васильевлул республикалул къуллугъчитуращал агьамсса масъалартту ххал

бивгьунни. Совещание дайдирхьунни Шамиллул райондалийсса оьрчIал лагерьданий чIявусса оьрчIру, инжит хьуну, азарханалийн багьсса иширая.

П. Рамазанова
ЦIуллу-сагъшиву дуру­ччаврил министр Жамалуттин ХIажиибрагьимовлул бувсунни азарханалийсса оьрчIан аьркин­сса даруртту биялну бушиву, кIара кьини Минздраврал пишакартал азарханалийн лавгшиву. ДР-лул Роспотребнадзорданул хъунмур Элеонора Оьмариевал бувсунни лагерьданийсса оьрчIру инжит шаврил савав продукты дагьай­сса куццуй къаядуллай бивкIшиву дикIан бюхъайшиву. Элмулул ва  кIулшиву дулаврил министр Уммупазил Оьмаровал бувсунни лагерьданий ливчIми оьрчIан дуллалисса дукиялул ялув бавцIуну бушиву.
ЖКХ-лул ва строительствалул министр Малик Баглиевлул доклад бунни, республикалул шагьрурдал паркру ва кIичIиртту бакьин баврил тагьарданиясса. Мунал бувсунни ларгсса шинал ккаккан бувсса 700 миллиондалух Дарбантливсса кIива паркгу, шагьрурдай 112 хIаятгу дакьин дуршиву. Бувсунни вара проект­рал лагрулий ттигу 680 хIаят дакьин дувансса ният душиву.
Владимир Васильевлул бувсунни Дагъусттаннал шагьрурду, кIичIиртту, хIаятругу, лазилакьи дурну, ххуйсса даражалийн дуцин аьркиншиву ва ми проектирдан кIани-кIанттурдайгу арцу ляхълан аьркиншиву, налогру датIлай, шагьрурдал бюджетир­ттавун арцу нани дувансса чаранну ккаклай.
Гьаз бунни совещаниялий республикалий ттукIрал даву сантирайн рутаврил масъалагу. «Да­гъусттаннал электросетирдал даву сантирайн рутлай агьам­сса даву дуллай бур «Россети», чIявусса трансформатордайн гуж багьлай бия, ттукI лешлай бия, чIярусса давурттив дуван багьлай бия, ми дуллай буссар, 1 млрд. ва 300 миллион ми иширттан харж бувантIиссар», — увкунни В. Васильевлул.
«МРСК» «Северный Кавказ» ПАО-рал гендиректорнал хъиривчу Сергей Поляковлул бувсунни республикалий зий бушиву Москавлиятусса электриктурал 299 бригада, 2500 инсан, ми муниципал образованиярттал хъуниминнащал уртакьну зий бушиву. Бувсунни Дагъусттаннал энергетикалул масъаларттаясса документал журалийсса фильм хIадур дувавриха зузисса группа бушиву, Москавуллал телевидениялия бувкIсса.

Къарабудахккантуллал, Буйнакскаллал ва Сергокъалаллал  районнал хъуниминнал барчаллагь кунни Москавуллал элект­риктурахь, районнай ттукIрал тагьар къулай хьунсса хъунисса давурттив дуваврихлу.
МахIачкъала шагьрулул архитектуралул чIалачIин ххуй даву, шагьру ччюрклицIа марцI буваву ва строительствалул аралуву  низам дишаву мурадрайсса давурттая бувсунни шагьрулул хъунаманал буржру чIумуйну биттур буллалисса Абуссупиян ХIасановлул.