Дагъусттанная августрай хIажлийн наниссар ацIазара инсан. ХIажлийн наними биян баврилсса, буцаврилсса буллалисса туроператор «Марва – турданул» вакилнал бувсунни вай гьантрай МахIачкъалаллал Хъун мизитрачIату автобусирттай тIайла був­к­шиву аэропортрайн цалчинми группарду. 

---

П. Рамазанова
Дагъусттаннансса квота дусса дур 9469 кIану, ялами кIанттурду – резервраватусса. МахIачкъалаллал аэропортрал Мадиналив 32 рейс дувантIий дур, Дубайлийнсса рейсирдайми тичча автобусирттай биян бувантIий бур. ХIажлийн гьан ччиманая харж хьунтIий дур 2500-3100 доллар, транспортрах, гостиницалух бурувгун.

— Август зурул 1-нний ва 3-нний цалчинми рейсру дур­ссар, ми хIукуматран бурж ба­къамири. Буржру буну тIий, 228 дагъусттанчу Аьрасатнава къаитаакьин бюхъайссар, миннан цинявннан баян бувссар, бурж къалахъарча, хIаж къабувну личIан бюхъайшиву, — тIий ур муфтият­рал пресс-службалул зузала.
«Марва-турданулгу» зурул хьхьичIва маслихIат бувну бур хIажлийн хIадур хъанахъиминнан, судрал приставтурал Федерал службалул сайтрай, цIа, бакI, увсса шингу чирчуну, бурж бусса-бакъасса ххал буван, амма къулагъас къадуллалиссагу бу­сса бур, мунияту, визагу дурну, самолетрайн регистрациягу дурну, таможнялул ххал буллалисса лахIзалий леххан ихтияр къадуллай, рейсирдая ца­ппара аэропортрай бацIан бувну бур. Вайннал визардахсса ва билетирттахсса арцу нахIакьдан харж дурсса арцу хъанай дур, ми зана дувангу хъанай ба­къар.

[dropcap]М[/dropcap]унияту, чIун дунура, бурж ла­хъияра, хъирив буккияра тIий бур хIажлил иширтталсса буллалими.
Цалчинми рейсирдай лавг­ми Мадиналий мубараксса кIанттурдайн экскурсиярттайн занай бур, ми Ан-Набавил мизитрая арх бакъасса гостиницалий бур. Ца-ца номердануву – ххю-ххюя инсан. Мяйва гьантта Мадиналийгу бувну, яла Маккалийн гьантIий бур. ХIажлил группардай каялувшиву дуллалиминнахь, Башларовлул цIанийсса медициналул колледжраву хIаж буллалиминнащал цукун зана-кьулу хъанан аьркинссарив, агана миннащал къалмакъал хьун нанисса иш чIаларча, му цукун хьун къаритан аьркинссарив лахьхьин буллалисса лекцияр­ттугу був­ккуну бур.

КIиришиврул инжит був­сса, бувххун, багьтIатI хьу­сса инсантал аьраттал буклаки­сса ишругу шайсса бур, мунияту миннан лахьхьин бувну бур ссавурданий хIакинтуращал зун, тIааьндакъашивуртту хьун къаритан.
Маккаливсса махъра-махъсса рейсру Дагъусттанная ва зурул 13-нний ва 14-нний дур.