Хъюйннал шяраву
Август зурул 7-нний Ккуллал райондалул муниципал сакиншиндарал бакIчи Рамазанов Шамил хьунаавкьунни Хъюйннал жяматращал. Укунсса хьунабакьавуртту хьуссар 1-мур ЦIувкIуллал, ЧIяйннал, ЦIуйшиял,
СумбатIуллал жяматирттащалгу. Ванащал бувкIун бия райондалул администрациялул жаваблувсса пишакарталгу. Шяраваллал инсантал зунсса давурттив диркIсса СПК-ду сайки дусса-дакъасса кIулну бакъар. Цайми давуртту райондалий хъинну чанну дакъа дакъар. ХIукуматрал чулухагу цIана налогру тIалав дуллалавуртту хьхьичI нани дурну бур.
[dropcap]В[/dropcap]ана, райондалул бакIчи жяматращал хьунаавкьусса культуралул къатригума лекьлай дайдирхьусса дия. Гьай-гьай, шяраваллил жяматрал гьаз буллай бия райондалул бакIчинал хьхьичI чIявусса суаллу. Вай суаллу цакьнива циван къабуллай бивкIссар тIисса пикрирдугу хIасул хъанай бия. Хьунабакьаврий ихтилатру бувна, шяраваллил иш-тагьардания буслай, ЧIяйннал ва Хъюйннал цачIусса администрациялул бакIчи Ися МахIаммадовлул, шяраваллил культуралул къатлул хъунмур Сулжанат АхIмадовал ва цайминналгу. Райондалул бакIчинал бувчIинну бувсуна гьаз буллалисса суаллу щил цукун щаллу буван багьлагьиссарив. Дуллуна жавабру жяматрал суаллахьхьунгу.
Вихьуллал шяраву
[dropcap]А[/dropcap]вгуст зурул 8-нний Ккуллал райондалул бакIчи хьунаавкьунни Вихьуллал шяраваллил жяматращал. Хьунабакьаврий мукунма гьуртту хъанай бия райондалул бакIчинал хъиривма Анатолий Давдиев, администрациялул иширттал каялувчи Юсуп Исакьов, отделлал каялувчитал МахIаммад ХIажиев ва Щамхал Хизриев.
Цалчин суал-ихтилат бувна Вихьуллал школалул директор Аьлил МахIаммадовлул. Ванал кIицI бувна Вихьлив цIуну буллалисса школа бавцIуну бушиву, чара бакъа му къуртал буван багьлай бушиву. Ва иширан жаваб дуллай, райондалул бакIчинал бувсуна цува республикалул хIукуматрахь мунил ялувсса ихтилат буллай ушиву, КIулшиву дулаврил министерствалул ялун нанисса 2019-ку шинал му школа пландалувун бувтшиву.
[dropcap]Р[/dropcap]айондалул бакIчинал хьхьичI гьаз буллалисса масъаларттуну ялагу бия шяраваллил культуралул къатрал магъи, чIиртту лекьлай бушиву, ми дакьин дуван багьлай бушиву, чапур хьусса ятту-гъаттара буччайсса «скотомогильник» дан багьлай бушиву, гъаттарайн ххалаххи буван бюхъайсса расколь аьркинну душиву, жяматрахь къацIувххуна, чIярусса гектарду ижаралий дуллуну душиву, шяраваллил инсантурал ятту-гъаттара ябуллалавриву низам дакъашиву, ОьхIлилату Вихьуллал чулухунмай нанисса ххуллу ххуйсса бакъашиву ва цаймигу цIуцIи суаллу.
[dropcap]К[/dropcap]куллал райондалийсса ххуллурдал идаралул хъунама Аьвдулхаликь ТIутIилаевлул бувсуна ОьхIлила Кьукнив бияннинсса ххуллу Лакрал райондалул аьрщарайх нанисса ххуллу бушиву, ганил жавабгу тайннал дулун аьркиншиву, Кьукуннал шанбачIулия Хъювхъиял шяравун бияннинсса, Вихьлияту Ссухъияхьхьун бияннинсса ххуллурду бакьин буван пландалийн лавсун бушиву, мигу, арцу итадакьайхту, Дагъусттаннал хIукуматрал буллантIишиву. Шиккува ванал кIицI бувна райондалул вивсса ххуллурдал ялув бацIан цанна итадакьайшиву 2500 къуруш ца километралун хIисавну. Миннуя налогру дуллуну махъ лирчIминнух дувайшиву давурттив.
Жяматрал суаллахьхьун жавабру дуллуна райондалул бакIчи Шамил Рамазановлул, шяраваллил бакIчи СайкIу Сулаймановлул.
Вихьуллал шяраваллил жямат рязину ливчIуна хьунабакьаврий. Учин мукъун, вай бия райондалул бакIчи цащала хьунаавкьусса чIун махъсса шиннардий та хьуссаривгума дакIния ларгунни тIий.
ХIадур бувссар
ХI. ХIусайновлул
