[dropcap][/dropcap]Августрал 22-нний, Аьрасатнал ПаччахIлугърал Ттугълил кьини, ДР-лул культуралул министрнал буржру чIумуйну биттур буллалисса 

Зарема Буттаевал республикалул культуралул ва паччахIлугърал ишккаккултран наградартту дуллунни.

БатIаврил дайдихьулий министрнал увкунни:
— ХьхьичIва-хьхьичI барчаллагь учин ччай бура зухь культуралул аралуву дуллалисса хъуннасса даврихлу. Жухра ялугьлай дуссар чIяру-чIярусса давуртту, жува аьркинссару хIакьину билаятрай хъанахъисса дахханашивурттавух хьхьичIунну гьуртту хъанан.

ХIакьину ласласисса ларайсса наградарттугу барча дуллай, чIа тIий бура зун цIакьсса цIуллу-сагъшиву, — куну.
Гихунмай министрнал рес­публикалул цIаний бувсса захI­матрахлу, ларайсса ккаккиярттахлу республикалул культуралул аралуву зузиминнан дуллунни ХIурматрал грамотар­тту ва бусравсса цIарду, ДР-лул БакIчинал цIа кусса ссятру. Миннавух бия Апанни Къапиевлул цIанийсса Лакрал музыкалул ва драмалул театрданул артистъталгу. Шамсуттин Къаплановлун дуллунни «Дагъусттаннал халкьуннал артист» тIисса цIа, Жинасат ДинмахIаммадован дуллунни ДР-лул ХIукуматрал чулухасса ХIурматрал грамота.

ДР-лул Культуралул министерствалул чулухасса ХIур­матрал грамотартту дуллунни «Дагъус­ттаннал жагьилшиву», «Да­гъусттан», «Лезгинка» ансамбллан, Ссихьрал театрданул артистътуран, М. Жамаллул цIанийсса Дагъусттаннал Художествалул училищалул, МахIачкъалаллал музыкалул училищалул, Б. Мурадовал цIанийсса Дагъусттаннал культуралул ва искусствалул колледжрал, Р. ХIамзатовлул цIанийсса Национал библиотекалул зузалт­ран.