Август зурул 22-нний «Аьрасат – ттул тарих» тIисса тарихрал паркраву хьунни ДР-лул ХIукуматрал председатель Артем Здунов гьурттусса пресс-конференция.

Ва хас дурну дия «Ттул Дагъусттан» тIисса проектран, зун­сса инсантал дистанциялул журалий язи бугьлагьисса ятIап къуртал шаврин.
Пресс-конференция дачин дурнугу ия ХIукуматрал ва БакIчинал администрациялул информациялул политикалулсса буллалисса управлениялул хъунама Зубайру Зубайруев.
Артем Здуновлул бувсунни министр­тал ва цинявппа къуллугъчитал му конкурсрал хъирив бавцIуну бушиву.

Бувсунни Аьрасатнал цинярда регионнаясса жагьилтал гьуртту хьушиву конкурсрай, рейтинграл хIасиллайн бувну, 15 региондалул вакилтал хьхьичIунминнавух бушиву, укун чIявусса инсантал гьуртту шаврил конкурсрал сий гьаз дуршиву.
Аьмну дистанциялул ятIапрай гьур­тту хьуну ур 6150 инсан, миннавату 80% — дагъусттанлувтал, ливчIми – цайми регионнаясса. Ца финалистка Пакисттаннай яхъанахъисса бусса бур. Финалистуравух бур элмурдал доктортал ва кандидатътал.

ХIукуматрал ва БакIчинал администрациялул хъунама Владимир Ивановлул бувсунни финалистурал уттигу тестированиялул журалий хьусса хIасиллу ххал дигьинтIишиву, конкурсраву ххув хьуми давурттай бавцIуну республикалул социал-экономикалул тагьар сантирай ва лябукку буну хьхьичIуннай хьун дуван­ссар тIисса умудрай бушиву. Халкьуннал хозяйствалул паччахIлугърал университетрал ректорнал, Ялув бацIаврил советрал член ЯхIия Бучаевлул кIицI лавгунни конкурс низамрал кьаралданул лагрулий, тIайлану ва аьчухну хьушиву, жагьилсса, зун ччисса инсантурал цалва бюхъу-гьунар ва кIулшивуртту ккаккан дувансса сант хьушиву ва ххув хьуминнал, му сантгу ишла дурну, къуллугъир­ттай бавцIуну, хайр-мюнпатсса давурттив дулланссар тIисса умуд бушиву.

«На дакI дарцIуну ура ва конкурсрал хIасиллайну жува Дагъусттаннал тарихраву цIусса хха кьабитаншиврий», — увкунни конференциялул даву къуртал дуллай, А. Здуновлул.