[dropcap]И[/dropcap]юльданул 28-нний ДР-лул БакIчинал кIанайма Владимир Васильевлул ХIук­мулийну ХIажибуттал арс ХIа­­жимахIаммад ХIусайнов ивтунни ДР-лул ХIукуматрал председательнал хъиривчунал кIанайману.

ХI. ХIусайнов увну ур 1977 шинал ГьунчIукьатIрал шяраватусса ХIажибуттал ва ТIулизматусса Саидал къушлий. МахIачкъалалив, 1998 шинал къуртал бувну бур Да­гъусттаннал паччахIлугърал университет, лавхьхьуну бур дунияллул экономикалул пи­ша. Ва ур экономикалул элмурдал кандидат.
1996-1999 шиннардий зий ивкIссар МахIачкъалаллал хьхьирил портрал администрациялий экономистну, яла – хъуна-хъунама инженерну.

1998-2001 шиннардий бувккуну бур Аьрасатнал элмурдал академиялул дунияллул халкьуннал дянивсса экономикалул арардал институт­рал аспирантура.
2001-2011 шиннардий зий ивкIун ур Аьрасатнал Федерациялул Финансирттал министерствалул экономикалул бутIуй: Бюджетрал политикалул департаментрал хьхьичIунсса экспертну, хъунама пишакар-экспертну, отделданул хъунаманал хъиривчуну, отделданул хъунаману, Департаментрал директорнал хъиривчуну.

2011-2016 шиннардий – Аьра­сатнал Федерациялул Финансирттал министерствалул транспортрал, ххуллул хозяйствалул, тIабиаьт дуруччаврил ва агропромышленностьрал комплексрал бутIуй. 2016 шиная цIанасса чIумалнин зий ивкIун ур АьФ-лул Экономикалул министерствалий Экономикалул бутIрал Бюджетрал политикалул департаментрал директорну.
АьФ-лул паччахIлугърал 3-мур классрал советник.

«Илчи» кказитрал редакциялул ва ци­нявппагу буккултрал цIанияту барча буллай буру ХIажимахIаммадлул хъунмасса къуллугъ. Барачатну бугьаннав, тIайлабацIу баннав.