[dropcap]А[/dropcap]рвахIкьини Дагъусттаннал паччахIлугърал технический университетраву хьунни Дагъусттаннал промышленность хьхьичIуннай даврин хасъсса VII-мур стратегиялул сессия.
Имара Саидова
Шикку гьуртту хьунни ДР-лул ХIукуматрал председательнал хъиривчу ХIажимахIаммад ХIусайнов, Республикалул экономикалул министр ХIусман ХIасбулатов, ДР-лул промышленностьрал ва энергетикалул министрнал буржру биттур буллалисса Арслан Арсланов, промышленностьрал идарарттал каялувчитал, элмийсса экспертътал ва жяматийсса ишккаккулт.
ХIакьинусса Дагъусттаннал промышленность цукунсса тагьарданий дуссарив бусласисса ихтилат бунни ХIажимахIаммад ХIусайновлул.
— Дагъусттаннайсса производствалул итадакьлакьимур дур 7,6 % дирсса. ХIакьинусса кьини ва аралуву 22 азара инсан зий ушиврийн бувну, чIалай бур хьхьичIуннай дансса приоритетру душиву. Мунийн бувну жунма чул бищун багьлай бур федерал ведомстварттал паччахIлугърал программарттайн, — увкунни вице-премьернал.
Вай масъаларттая балжину бусласисса доклад бунни Арслан Арслановлул. Ванал кIицI лавгунни промышленниктурал хьхьичI бивхьусса агьамсса масъаларттуну хъанахъишиву паччахIлугърал обороналул заказру гьарза даву, приоритетсса инвестициярттал проектру иширайну зузи даву, предприятияртту цIу дуккан даву.
Ванал мукунма бувсунни министерствалул хъуннасса даву дуршиву, паччахIлугърал ва федерал цIакусса программарттаву дурсса гьурттушиннардал. 2017 шинал республикалул 15 промышленностьрал предприятие ва 7 идара гьуртту хьуну бур промышленность хьхьичIуннай даву мурадрайсса АьФ-лул 10-хъул паччахIлугърал программарттавух. Вайннул хIасиллайн бувну, республикалийн дучIан дурну дур 6,6 миллиард арцул, миннува 736 миллиондалунсса паччахIлугърал обороналул заказру.
Кластертурал Ассоциациялул Аьрасатнал технопаркращал цачIуну дайдирхьуну дур республикалий строительствалул материаллал промышленность сакин дуллалисса проект. Дагъусттаннал республикалий сакин бувну бур 5 индустриялул парк. Вайннул дучIан дурну дур 3,6 миллион арцул доходирттал ва сакин бувну бур 800 инсаннансса зузи кIану.
Докладру къуртал хьуну махъ сессиялул гьурттучитал зун бивкIунни республикалул промышленность хьхьичIуннай даву мурадрайсса приоритетсса ххуллу-чаранну лякъавриха.
Промышленность хьхьичIуннай даву мурадрайсса приоритетсса ххуллурдуну хIисав бунни элмийсса технологияртту цIу дуккан даву, производстварду гьануцIакул цIулаган даву, индустриялул паркру сакин ва хьхьичIунмай баву, кадрарду хIадур баву, куклу промышленностьру хьхьичIуннай даву.
ДакIнийн бутанну Стратегиялул сессия буллалишиву 2035 шинайн бияннин, ДР-лул социал-экономика хьхьичIуннай даву мурадрай кьамул дурсса программарттал лагрулий.
