Ларгсса бигьалагай кьини Дагъусттаннал БакIчи Владимир Васильев гьуртту хьунни «Россетирдал» учениярттал дайлитIулул шадлугърай.
Дагъусттаннал паччахIлугъ­рал филармониялул гъинттулмур залдануву хьусса ва мажлисрай гьуртту хьунни: Аьрасатнал Президентнал полпред Александр Матовников, Ухссавнил Ккавкказуллал иширттал­сса буллалисса министр Сергей Чеботарёв, ПАО «Россетилул» гендиректор Павел Ливинский, ДР-лул Халкьуннал Мажлисрал председатель Хизри Шихсаидов, ХIукуматрал председатель Артем Здунов ва цаймигу къуллугъчитал.

Александр Матовниковлул лахъсса кьимат бивщунни «Россетирдал» Дагъусттаннай дурсса даврин. «Ца зурул дянив мяйва зурул лажиндарай дувансса даву дурну дур», — увкунни ванал. Аьрасатнал Президентнал полпреднал кIицI лавгунни щалагу Ухссавнил Ккавкказуллал, мукунма Дагъусттаннал электросетирдал иш-тагьар къаххуйсса душиву, сетьру дух хьусса дуну ччя-ччяни ттукIру лешлай бушиву, ччувччусса ттукIрахсса багьа къабуллай хъунисса буржру бушиву, ми цимурца сантирайн рутан аьркиншиву ва му мурадрай зий бивкIшиву кумаг­ран бувкIсса электриктал. «Россетилул» компаниялухь, хасну гендиректорнахь, барчаллагь тIутIисса ихтилат бунни Аьрасатнал министр Сергей Чеботаревлулгу.
«Шинал хьхьичI, Дагъус­ттаннал парламентрал хьхьичI авцIуну, на увкуссия, на акъара зучIан увкIсса, зучIан Аьрасатри бувкIсса куну.

78 региондалия­сса электросетирдал пишакартал бувкIунни Дагъусттаннайн, цаллами давурттивгу дацIан дурну, кулпатругу кьабивтун. Да­гъусттаннал электросетирдал даву низамрайн рутан 1 миллиард ва 300 миллион арцул харж був­ссар, даву къуртал дуван бувассар, ххюра шинайсса программа бартдигьлай зий бацIантIиссар цайми кIанттурдая бувкIсса пишакартал», — увкунни В. Васильевлул.
Ванал кIицI лавгунни ми электриктурал ва дагъусттаннал агьалинал арарду нахIу-хIа­лимсса душиврулгу цува ххари увшиву. «Россетирдал» хъунама инженер Дмитрий Гвоздевлун ва коллективран дуллунни паччахIлугърал наградартту.
Каспий хьхьириву бюкьлакьисса инсантал ххассал бувсса Алексей Малышевлун, Дмитрий Саталкиннун ва Александр Маркеловлун дуллунни Республикалул БакIчинал цIа чирчусса каний дахIай ссятру, шамагу энергетик паччахIлугърал наградар­ттангу ккаккан бувантIишиву бувсунни Владимир Васильевлул.