Ларгсса хамискьини Щардал шяраву хъуннасса шадлугърай тIивтIунни жяматрал каширдацIух бувсса ттуплий буккай майдан «Щара-Арена».

Зулайхат Тахакьаева
Муний гьуртту хьунни райондалул бакIдургьуми, Дагъусттан Республикалул Туризмалул ва халкьуннал художествалул сянатирттал министерствалул вакил Шамил Малачиев, Марат Илиясов, Чапаевка шяраваллил администрациялул бакIчи Паша Кьурбанов ва чIявусса цаймигу.
Шадлугъ дачин дурсса Рамазан ЦIаххаевлул кутIану кIицI лавгуна Щардал тарих.

Муния махъ райондалул бакI­чи Юсуп МахIаммадовлул бувсуна ва стадион бан, сиптачиталгу хьуну, цала бакIрайн лавсун бивкIшиву Щардал жагьилтурал ва мукьра-ххюра шинал лажиндарай бувну бацIан бувшиву. КIицI лавгунни ва стадион цуппагу хьушиву республикалий цалчинсса стадион, халкьуннал цала каширдацIух бувсса. КIицI лавгуна мукунма Щардал шяраваллил бакIчи Мирослав Ибрагьимов райондалул шяраваллал бакIчитураву ца яла жяматращал авкьуну, жямат цачIун бувну зузисса бакIчи ушиву, бувсуна ва шяраву дуллалисса лябуккусса давурттал цайми щархъал жагьилтуравунгу гьавас бувтшиву.

«Ва стадион ххуллуцIва бушиврулгу жула дакIурдиву ца умуд цамургу ххи буллай бур, гьай балики, ххуллийх кIиху-шихунмай нанисса Ккуллал райондалул шяраваллал жагьилтуралгу эстафета кьамул дан, — увкуна Юсуп МахIаммадовлул. – Шиккува ххи бан, ва стадион так Щардал шяраваллил ва Лакрал райондалул жяматран куну къабувссар. Щардал жямат цачIун бувсса куццуй, ва стадиондалул цачIун бантIиссар щала лакрал миллат. Гьашину ххюйлчинсса шинни ва шяраву дуллай къуллугърал буржру би­ттур буллай ливтIусса низам дуруччай органнал зузалтрал аьпалунсса турнир. Мунил сиптачиталгу хьуссар вайва Щардал жагьилтал. Турнирданул сий ялу-ялун хъун хъанай дур. Умуд бур шикку рес­публикалул лагрулий­сса турнирду дулланссар тIисса. Мунинсса дайдихьулун на ­укканна «Сиражуттин Илиясовлул завалунсса Лакку улклул кубок» тIитIаврил ягу лакьаврил шадлугъру ва стадиондалий дуллансса пикрилущал», — ххи бувна ялагу Лакрал райондалул бакIчинал,

Юсуп МахIаммадовлул бувсунни шадлугърайн бучIан дакI­ний бивкIсса бусравсса хъамаллураща бучIан къавхьушиву, Аьра­сатнал аьрали министр Сергей Шойгу Дагъусттаннайн учIаву хьхьичIун дагьну. Цащава бучIан къабюхъарчагу, барча буллали­сса телеграммарду тIайла дурккун дия Дагъусттаннал миллатирттал политикалул ва кьатIаллищалсса дахIавурттал министр Татьяна Гамалейл, культуралул министр Зарема Буттаевал, Дагъусттан Республикалул БакIчинал аппаратрал ПаччахIлугърал къуллугърал ва наградартту дулаврил управлениялул каялувчи Артур Исрапиловлул, Дагъусттаннал Хъунисриннал советрал хъунаманал хъиривчу Сиражуттин Илиясовлул, Жяматийсса Палаталул хъунаманал хъиривчу Ссапар Аьбдуллаевлул, Дагъусттаннал медициналул институтрал ректор Сулайман Маммаевлул.

Муния махъ Юсуп МахIам­мадовлул райондалул администрациялул чулухасса барчаллагьрал чагъарду буллуна Щара-Арена бавриву чялишсса гьурттушинна дурсса инсантуран. Шяраваллил бакIчинащал ца хъуннасса хъар цайнна ларсъсса, му бакъа­сса, Щардал школа «Ттуршва школа» программалийн ласуншиврул цала чулуха мукьттуршазарда къуруш дуллусса жагьилсса ишбажаранчи, МахIачкъалаливсса «Сирона» тIисса стоматологиялул поликлиникалул хъунама хIакин Кьурбан Халидовлун дуллуна Лакрал райондалул Бусравсса гражданиннал цIа.
Шяраваллин пишкаш бувунни ОьрчIал городок.

Мирослав Ибрагьимов, Щардал шяраваллил администрациялул бакIчи:
— Ттун хъинну бювххуна аьпа­биву жула Надир Хачилаевлул кьура шинал хьхьичI ца батIаврий увкусса махъру: «Жула бияла жула кIунттихьхьун ласун багьлай бур», — тIисса. Жула бияла жула кIунттихьхьун ласун, хасну ттула жяматран, кьура шин аьркин хьуну духьурчагу, хIакьину дуркIун дур мукунсса кьини. Жагьилтурал сипта жяматрал хъинчулий ккарккун, бюджетрава къуруш харж къадурну, халкьуннал арцух ва захIматрах ва даражалийсса стадион бан бюхъаву – му хъуннасса виричушивур. Ва стадион хьун аьркинссар хъинсса давурттал дайдихьуну. Ттигу жула хьхьичI хъуни-хъунисса мурадру буссар. На хъунмасса барчаллагь тIий ура ва ишираву чIарав авцIусса Инишиял Апаннинахь, Хъурхърал шяраватусса Оьмар Наибовлухь. Ва ххуллийх машиналий нанисса инсанталгу, чIарах къабувккун, кумагру буллай бия. Шикку бишинсса сцена Гъумуча лавсун бувкIсса КАМАЗ-рал шупирнал, ва халкьуннал дуллалисса даву душиву кIул хьувкун, ттул чулухасса кумаг бикIувча куну, арцу къаларсунни. Буттал кIану ххирашиврул барашиннар мугу.

Кьурбан Халидов:
— ХIакьину ттул шяраваллий дирзсса аргъ къалещаннав абадлий. Ва стадион буллай байбивхьуссару жу, шяраваллил жагьилтал цачIун бансса мурадрай. Жуща му мурад бартбигьин бювхъунни. ЦачIушивручIа гужгу цIакь хьуссар. Аллагьнал кабакьаврищал ттигу жува цаймигу мурадру чулийн буккан бантIиссар.

— ХIакьину ва байрандалий на мукIру хьура жяматрал цашиву духьурча, чIявусса мурадру бартбигьин бюхъайшиврийн, — куна цала ихтилатраву Марат Илиясовлул.
Ва стадион, так ца лакрал бакъасса, щалагу республикалун лябуккусса хьуншиврий чIурчIав дуллай, Щардал жяматрахь барчаллагь тIисса ихтилатру бувуна Шамил Малачиевлул ва Паша Кьурбановлул.
Лакрал сий дусса балайчи Ссамад Буттаевлул ва райондалул магьирлугърал зузалтрал сакиншиндарайну хъамаллуран кка­ккан дурна ххаллилсса концертгу. Мунил хъамалну бия Нурианна Къаллаева, Марианна, Даниэл Гьарунов.