Дагъусттаннал Журналистътурал союзрал цимилагу гьаз був­ссия журналистътуран «Культуралул лайкь хьусса зузала» тIисса цIа къадуллай, «Лайкь хьусса журналист» тIисса цIа дулаван аьркинни тIисса масъала.

ПатIимат Рамазанова
Буниялттунгу, культуралул зузалтран харжру ххи бувсса ппурттуву, зу культуралийн къабагьайссару куну, журналистътуран къагьаз бувссия, цIарду дулайнирив, культуралул лайкь хьусса зузалтрал цIардуя дулай­сса. Гьашину Калининградрай хьусса медиафорумрай Жяматийсса халкьуннал фронтралгу (ОНФ) укуннасса тIалавшинна дурссия, яъни «Заслуженный журналист» тIисса цIа дулаван аьркинссар тIисса. Халкьуннал Фронтрал бакIчинал, Аьрасатнал Президент Владимир Путиннул тиккусса батIаврий кIицI лавгуна билаятрай оьрму хьхьичIунмай хъит учин бавриву журналистътурал даврил биялсса бутIа бушиву ва махъ буллуна цIа дулаврил иширал бази буван.

Июль зурул 19-нний Путиннул, «Аьрасатнал Федерациялул паччахIлугърал наградарттал системалул цаппара масъалартту» тIисса указрай къулбас дурссар, «Заслуженный журналист» ва «Заслуженный работник связи и информации» тIисса бусравсса цIарду цIакь дур­ссар. Документ буссар билаятрал БакIчинал сайтрай.

— На ххарира укунсса цIарду дуллансса хIукму баврия, журналистътал агьамсса даву дуллай бухьувкун, миннал даврин ва захIматран лайкьсса кьиматгу бищаван аьркинни. Кувни журналистътурал хIарачатрайну бартбигьин бю­хъай къюву­сса масъалартту, ми цивппагу нигьачIинна дусса даврий зий бур, шикку на чIурчIав дуллалиссагу коррупциялущалсса талатаврий ва журналистътурал хъиривлаявурттайра, Аьрасатнавусса журналистътал, цалва оьрмулун нигьачIин дунура, чялишну зий бур. Бусрав­сса цIардал тIурча, бюхъулий ва яхIлий зунсса гъира ххи буванссар тIий ура, — тIий ур ОНФ-рал Централ штабрал член, ПаччахIлугърал Думалул депутат Николай Будуев.