Чурххангу бузсса, нагу-нахIусса

[dropcap]М[/dropcap]ахIачкъалалив сийлийн дагьну дур «Грильетта» кафелуву дуллалисса дагъусттан дукрарду: лакку зумунусса къячIив, даргиял чуттурду, буркив, аьрайн-гьавккуртту, жура-журасса бувцIу ххункIру, пачливу дагъ бувсса аьнакIи, дукьрахIан.


Махъсса ппурттуву хъинну чIяву хьунни шагьрулуву ххуйсса, нахIусса дукрарду дайсса каферду. Минниягу хъуннасса рахIатшиву дур давур­ттайхсса инсантуран, дукра дан мажал бакъасса чIумал, ччарча шардайн дучIан дан, ччарча, бувкIун, гиккура дукан. НахIуну дукрарду дайми кIанттурдаягу инсантуран, кувнная кувннан баллай, ччяни кIул хъанай бур. Мукун, МахIачкъалалив сийлийн дагьну дур «Грильетта» кафелуву дуллалисса дагъус­ттан дукрарду: лакку зумуну­сса къячIив, даргиял чуттурду, буркив, аьрайн-гьавккуртту, жура-журасса бувцIу ххункIру, пачливу дагъ бувсса аьнакIи, дукьрахIан.

Дукра нахIуну даву бакъа­ссагу, кафелуву дур ляличIисса марцIшиву, ичIура куннасса чIюлушиву. Цал шиччаллил дукра ххал дурсса инсан, хаин къавхьуну, ва кафелул мудана­сса клиент шай.
Кафелул хъунмамурну бур бусса оьрмулий дукрардаха зий бивкIсса лакку душ, Хъювхъиял шяравасса Гулхалум Гъазиева (Къаллаева). Машлул ва кулинариялул училище къуртал бувну махъ шанна шинай Гулхалум зий бивкIун бур МахIачкъалалив личIи-личIисса рестораннай. Дукрарду даву ванил оьрмулухуннасса заву дур. Гулхалумлул цилалу дайсса диркIун дур хъатIайн-хъиншивурттайнсса, бивкIу-буккурдайнсса дукрарду. Укун бувсса кумаг хъинну бусрав шайсса бивкIун бур жяматрангу.

Маша-хашалул даврил кьюлтI­­шивуртту кIулсса Гулхалум Москавлий бивзун махъгу, ттучангу тIивтIуну, дахху-ласулухун багьну бур. Москавлив ванил дурну дур 20-хъул шинну.
Дагъусттаннайн бивзун махъгу цIунилгу цинна ххира хьу­сса даврихун багьну бур. Тихва бунува, хIадур бувну бур цила дук­рарду дуллансса кIанугу. Шанна шин шавай дур Гулхалумлул кафе тIивтIуну, амма ваничIа чIярусса шиннардий зузисса кафердавунияр гьарза­сса инсантал бур. Ва кафелия хавар буми, ца зумату кунма, буслан бикIай шиккусса дукралул нахIушиврия, кафелул залуннал аьчухшиврия. Гулхалумлул кафелуву тачIавгу къадикIайссар дурну тиннай дирхьусса, гьантта лавгсса дукра.
Дукра данмургу ванил, цуппа лавгун, ялув бавцIуну, яла язимур ласай.
КIицI къалавгун къабучIир шиккусса дукьрахIанттил нахIу­шивугу. ДукьрахIан дансса зинигу Гулхалумлул шиккува хIадур бай.

ГулхалумлучIа дукрарду дан кумаг буллалисса душру буслай бур, «къалай дуккияра, къалай дуккияра тIий», цал ялув бавцIуну бикIайссар тIий. Мяйжаннугу, къалай дурксса кунна дурсса, ишттахI багьансса дур ванил дукрарду.
Шиккува бусан, Гулхалумлул кафелуву бахлай бур нахIува-нахIусса щивщулул, инил кьанкьгу дусса, бангу бигьасса «Самарский здоровяк» тIисса хъувхъугу.

Шардайн дукра ласун ччиминнаща оьвчин бюхъайссар: 8-938-802-50-50; 8-929-867-28-28.
Кафелул адрес:
ХIамидова, №59.

Андриана Аьбдуллаева,
Имара Саидова