ХIажинал арс МахIаммадов Муртуз
Уттигъанну, оьрмулул 77 шинаву, аьпалухьхьун лавгунни уздансса зунттал чув, Ххут­рал шяравасса ХIажинал арс МахIаммадов Муртуз.

Увну ур Муртуз 1941 шинал Ххутрал шяраву. Къуртал бувну бур Иваново шагьрулий художествалул училище. Гьур­ттушинна дурну дур жула ва чил хIукуматирттай дуллалисса 130-ннийн дирсса экспозициярттай, 16 выставка цалалуссагу дурну дур жулла республикалул хъуншагьрулий. ЧIярусса шиннардий уссия Москавуллал Художниктурал союзрал отделениялий. Лайкь хьуссар «Дагъусттаннал халкьуннал художник» тIисса цIанин. Зийгу, яхъанайгу уссия Москавлив.

Ванал произведенияртту бу­ссар Аьрасатнал ва чил билаятирттай музейрдал коллекциярттаву. ЧIярусса давуртту ду­ссар П.С. ХIамзатовал цIанийсса Дагъусттаннал изобразительный искусствалул музейравугу, А. Тахо-Годил цIанийсса музейравугу.
Муртуз ахиратрал шаврил кьурчIишиву кIидачIлай, жижара буллай буру гъан-маччанахь махъсса щалагу агьлу-авладрахь. Цал гьав нурданул дуцIиннав, алжаннул ххари аннав. Амин.
Ххутрал жямат

---

Зулайхатлул аьпалун

Циняннангу бусравсса,
Бусса кIантту ххуй байсса,
Щакъаливхнува лавгсса,
Жул Зулайхат, жул бавай.

Заннаятугу начну,
Виятугу намусну,
Ина гъили бувайсса
Къатта микIлавчIун буру.

Вил нахIу-хIалим чIугу
Бакъар тти къушлий баллай.
Ина кьабивтун мукьах
Ужагъ гъили къалагай.

Вийну ххари шай яру
Ятинну ливчIун бури.
Ина гьарта дай дакIру,
Къуману лирчIун дури.

Язисса вицIа хьуну,
Ялгъузну ливчIун буру.
Ялунмай хъяй бунугу,
Вих хъювхъу тIийнма буру.

Жул пахругу, пагьмугу
ВицIунссаяхха бусса,
Цан лахIан дав жул бакIру,
АрхIалва личIи хьуну.

Вагу ци дуниялли,
Бургъил чани бунугу,
Бургъияргу чаннасса
Ина хьхьичIа лавсун махъ.

Ина ичIува чIарав
ЧIалай тти бакъанугу
Жул дакIурдил дунъяллий
Яхъанайнма буссара.

Вих мякьнувасса вилцири,
ш. ЧIяйми