[dropcap]В[/dropcap]ай гьантрай Дагъусттаннайн бувкIунни Нижневартовскалиясса хъамал: «Югра многоликая» тIисса антологиялул автор, поэтесса Любовь Миняева, поэтесса ва журналист Мария Волдина-Вагатова ва Югралийсса Дагъусттаннал диаспоралул вакил ХIабибуллагь Мирзаев. Ми хьунабавкьунни ДР-лул культуралул министр Зарема Буттаеващал. Ханты-Мансийскаллал автоном округрал – Югралул ва Дагъусттаннал агьалинал халкьуннал дянивсса дусшиврийсса арарду цIакь дуллалаврихлу «Югра многоликая» тIисса медаллу дуллунни Мария Волдинан-Вагатован ва ХIабибуллагь Мирзаевлун. Медаллугу дулун тапшур бунни Зарема Буттаевайн.

---

П. Рамазанова
Бивунни хъамал лакрал машгьурсса чичу МахIаммад Оьмаровлул душнил Диларал ужагърайнгу – дунияллия лавгун махъ МахIаммад Оьмаров «Югра многоликая» медаль дулун ккаккан увну ухьувкун, му медаль наслулухьхьун тапшур дуван. Ва Аьрасатнал халкьуннал культура, литература гьаз дуван ва халкьуннал дянивсса дусшиврий­сса арарду цIакь дуван хIарачат буллалиминнан дулайсса медаль дур, цурдагу региондалул губернаторнал цIакь дурсса. МахIаммад Оьмаровлул дяъвилул тема аьч дуллалисса, бюххансса шеърирдан ва таржума бувсса шеърирдан лавайсса кьимат бивщуну бур антологиялуха зузиминнал.

Любовь Миляевал бувсунни «Югра многоликая» тIисса антология 14 шинал лажиндарай итабакьлай бушиву, 2011 шиная шинмай Дагъусттаннал чичултгу му давривух гьуртту хъанай бушиву. Бувсунни антологиялуву 86 мазрайсса произведенияртту бушиву, гьарцагу миллатрал литература щалвагу Аьрасатнал ва дунияллул литературалул хъус хъанахъишиву. Антологиялий кIивагу мазрай бищайсса бур произведенияртту: оьрус мазрай ва чичул ниттил мазрай.
Любовь Геннадьевнал бувсунни кIицI лавгсса антология Москавуллал паччахIлугърал университетрал элмийсса библиотекалул фондравун багьлагьишиву, Франциянаву Сорбонналул университетрал студентътуралгу лахьхьайшиву му антология.

На цичIанма оьвчайхту, Любовь Миляевал бувсунни МахIаммад Оьмаровлул таржума бувшиву машгьурсса шаэр, пуб­лицист ва литературалул критик Владимир Фомичёвлул ва цилва шеърирду. Ми шеърирду бакъа­ссагу, антологиялуву лакраясса ва лакку мазраясса макьалагу душиву ва МГУ-лул, Франциянал Сорбонналул университетрал ва Ереваннал университетрал студентъталгу лакрал багьу-бизу ва лакку маз гьаманки му антологиялия лахьлай бушиву. «Цуксса кьурчIинугу, МахIаммад ХIажимусаевич дунияллия лавгунни антология дунияллийн букканнин, ва антологиялул оьрмурив лахъисса хьуншиврий дакI дарцIуну бура, лак­рал бусравсса чичу, шаэр, пуб­лицист МахIаммад Оьмаровлул биография ва мунал таржумар­тту лахьлантIиссар антологиялий. Нагу, лакрал миллатрайн ссалам гьан буллай, МахIаммад Оьмаров кунмасса чичултрал кьимат лавай буллалияра тIий бура», — увкунни Любовь Геннадьевнал. Вайнна МахIаммад Оьмаровлул таржума бувсса шеърирдавасса ца-кIива асар.

Владимир Фомичёв

* * *
Шиннардивух ша
ласлай,
Лявхъу къаттагу ина.
Пахъдагьру чанна
лахълай,
Дунъяллун нургу ина.

Гъарал ва занч
ца хьунни,
Ца хьунни аьрщи ва ссав.
Нагу навалу цуяв?
Инсанна вищал
хьуни!

Дус хьунни, тяхъа
бувккун,
Душманну бивкlми хlатта.
Аьрщигу хьунни
къатта
Ччаву талихlрайн дурккун.
Любовь Миляева

* * *
Ча-чун бярдал
дарарду,
Ссурула – къузурдил
Чlукlа.
Чlунивугу – цачlу
Зухсса ччаврил асарду.

Лехлай бур, лахlза
кунма,
Аьрасат улча кунма,
Къузурдил чlуний балай,
Дакl цlуницlа цlу дуллай.