Кказитрал ва номердания тиннай, жу дакIний буру чIун-чIумуй ришлан Тарихрал, культуралул ва архитектуралул гьайкаллу дуруччаврил Республикалул центрданул цIаниясса чичрурду.
Аьрасатнал Федерациялул халкьуннал культуралул ирсирал объектру (тарихрал ва культуралул гьайкаллу) хъанахъиссар билаят социал ва экономикалул чулуха хьхьичIунмай шаврил агьамсса факторну.
Дагъусттан Республикалул аьрщарай дуссар культуралул ирсирал федерал ва региондалул агьамшиврул статус дусса 6354 объект. Миннувух дур тарихрал, культуралул, археологиялул гьайкаллу, мукунна ми щаллагу дунияллул ирсну бушиврий ЮНЕСКОлул мукIрушин дурсса гьайкаллу.
Культуралул ирсирал объектирдал ккал ва миннул ляличIишиву хIисавравун ларсун, Дагъусттан Республика духлахиссар Аьрасатнал Федерациялул субъектирдал лаваймур лигалувун.
Жулла республикалий мукунсса объектру дуруччавриха ва машгьур давриха зий буссар ДР-лул Культуралул ирс буруччаврил агентство.
[dropcap]А[/dropcap]гентствалул хьхьичIунсса гьурттушинна дуллалиссар законотворчествалулмур давриву, ххал дигьлагьиссар федерал ва региондалул лагрулийсса норматив правалул актирдал проектру, мукунна региондалул законопроектру. Дуллалиссар ялув бацIаврил давуртту, иш багьни, жавабрайн кIункIу буллалиссар тахсир хьуми. Му бакъассагу, дуллалиссар культуралул ирсирал объектру цIу лаган дуллалаврил ялувсса давугу.
Цила давриву Агентствалул хъуннасса къулагъас дуллалиссар жяматращалсса даврих. Республикалул организацияртту, агьали давривух хIала буваншиврул, сакин бувссар Жяматийсса совет. Мивун бухлахиссар аьлимтал, журналистътал, архитектортал, культуралул ирс буруччаврил аралул пишакартал ва м.ц.
[dropcap]Р[/dropcap]еспубликалий цалчинма цалчин сакин бувссар Культуралул ирсирал объектирдал тагьарданул мониторинг дуллалаврил жяматийсса инспектортурал институт. Цуксса хIайпнугу, цIанасса чIумал Лакрал, Ккуллал ва ЦIуссалакрал районнал ккаккан дуван дурар цала чулухасса жяматийсса инспектортурал цIарду. ОьвтIий буру лакрал общественнострайн цала буттахъал тарихрал ва культуралул ирс буруччавривух чялишну гьуртту хъанан.
Къачанну шай цумур-дунугу объект гьайкалну душиву, мунил чулухуннай дуван аьркинмур кIул-къакIулшиву сававну, инсантурал низам ва закон лиян дурсса ишру. Мукунсса иширттал хьхьичIалу кьукьаву мурадрай, Агентствалул республикалул циняв шагьрурдайн ва шяраваллавун гьан дурссар культуралул ирсирал объектирдал сияхIру. Агентство мудангу хIадурну буссар гьайкаллу дуруччаврийн багьайсса масъаларттал ялув агьалинащал ва личIи-личIисса идарарттащал уртакьшиврий зун.
Руслан ХIажиев,
Тарихрал, культуралул ва архитектуралул гьайкаллул дуруччаврил Республикалул центрданул директор
ХIадур бувссар
Бадрижамал Аьлиевал
