Июль зурул 10-нний Египетнал Асьютский университетрал делегация бивунни Аьрасатнал халкьуннал дусшиврул музейравун.

Имара Саидова
Хъамаллуращалсса экскурсиялий гьуртту хьунни ДР-лул миллатирттал политикалул министрнал хъиривчу Арсен МахIмудов, Дунияллул халкьуннал ва регионнал дянивсса дахIавурттал ва граждан институтирттащал­сса даврил управлениялул хъунама ГъазимахIаммад ХIажиев ва «Интердусшиву» тIисса чил билаятирттал студентътурал суккушиннардал вакилтал.

[dropcap]Д[/dropcap]усшиврул къатравусса музейрал директор Георгий Гьаруновлул балжину бувсунни Дагъусттанная ва дагъусттан халкьуннал аьдатир­ттая. Ккаккан дурунни Аьрасатнал халкьуннал миллатирттал багьу-бизулия бусласисса экспонатру, хьхьичIарасса ва утти­сса Ккавкказуллал халкьуннал лаххи-ликкия.

Студентътурахь къабувчI­ла­чIимур ва миннан кIул хьун ччимур буслай бия музейравусса таржумачитал.
Шиккува кIицI лаган, июнь зурул 29-нния июль зурул 15-ннийн бияннин, Дагъусттаннал паччахIлугърал университетрал оьвчаврийн бувну, кьамул буллай буссар Аьрабнал республикалиясса студентътурал делегацияртту.

Ва ххуллухсса хъамаллурал аьр­ххилул мурад бия «Культурарду мачча хъанахъаву» тIисса дунияллул халкьуннал студентътурал слетрал давривух гьуртту шаву ва Аьра­сатнал ва Египетнал жагьилтурал дусшиврий­сса хьунабакьаврил гьанурду цIакь баву.