Жижара

Кьасиннул арс Дадуев Рамазан

Июльданул 1-нний, захIматсса цIуцIаврища ххассал къавхьуну, аьпалухьхьун лавгунни Хъусращатусса яхI-къириятрал заллу, захIматчи Дадуев Рамазан.

 

Увну ур Рамазан 1957-ку шинал Хъусрахь. Буттал шяраву школагу къуртал бувну, увххун ур шяраваллил хозяйстволул институтравун. Муния мукьах зий ивкIун ур шяраваллил хозяйствалул личIи-личIисса давурттай. Чув зий унугу, Рамазаннул ккаккан бувссар цува дакI марцIсса, тIайламур ххирасса, захIмат бан ччисса инсан ушиву.
Рамазаннул хъунмасса захI­мат бивхьуссар Совет Союзрайх цIа ларгсса Казбековлул цIанийсса колхоз лавайсса даражалийн гьаз давриву.
Агь, ца къаччивахха ванан тIайла дакъашиву. Ванал бусравсса цIа абадлий личIантIиссар ва кIулну ивкIсса цинявннал дакIурдиву.
Рамазан аьпалухьхьун лагаврил кьурчIишиву кIидачIлай буру ванал арсурваврахь, махъсса гъан-маччанахь, цинявннахьвагу. РухI хъинний дишиннав, алжаннул ххари аннав, Аллагьнал вил бунагьру шювшуну лякъиннав.

Хъусращиял жямат

Рамазаннул
аьпалун

Зий, занайна ияв,
Колхоз гьаз дуллай,
Амма пасат хьунни
Вил щала хиял.

ЦIараву къирнияр
ЦIавцIлай унугу,
Гьаз буллайна ияв
Ина тIайламур.

Зунттуяр бюхттулсса
Жул ххира уссай,
Заманалул ина
Айсса куц ассан.

ЦIаннавун оьвкьунна,
КIяла барз куна,
ЦIан лаган дувунни
Жунгу дуниял.

Цибанну, бакъархха
БивкIулун чаран,
ТIитIиннав Аллагьнал
Вин лув дуниял!


Сайпуллагьлул арс МахIаммадов Рашид

Уттигъанну, захIматсса азардануща ххассал къавхьуну, жуятува личIи хьунни Сайпуллагьлул арс МахIаммадов Рашид.
Рашид увну ур 1948 шиналКкуллал шяраву Диччихъал Сайпуллагьлул ва Муъминатлул кулпатраву.
Дяъвилия мушакъат хьуну зана хьусса Сайпуллагьлун хьхьичIа-хьхьичI увсса арс Рашидлуха чIалачIин къадиркIун дур. Хъуна хъанахъиссаксса Рашидлун чIалай бивкIун бур цувагу, мюрщисса уссур-ссугу хъуни буван цуксса захIмат бишин багьлай бивкIссарив нитти-буттан. Цувагу чIивинияцIава нитти-буттай цIими бусса, захIмат ххирасса оьрчI ивкIун ур. Школалий дуклай унува, хияллай ивкIун ур летчик хьун. Школагу къуртал бувну, дуклан увххун ур Оренбургуллал аьрали летчиктал хIадур байсса училищалийн.

МарцIсса ххювардай училищагу къуртал бувсса лейтенант щалагу выпускрал хIаписартурава язи увгьуну ур хьхьириву лехлахисса летчиктурал кьюкьлувун уцин. Тивталсса ва сивсусса жагьил най унува хьуну ур эскадрильялул командир, ччясса мутталий дуллуну дур ванан полковникнал чин ва лайкь хьуну ур наградарттан.
Отставкалийн увккун махъгу Рашид цала кулпат Разиятлущал ялапар хъанай уссия Калининградрай. Хъунама арс Камилгу, буттал сянат язи дургьуну, летчик хьуну ур.
ХIайп, ххаллилсса пишакар, ас-намус бусса инсан жуятува личIи хьунни. Рашид ахиратрал шаврил кьурчIишиву кIидачIлай, жижара буллай буру кулпатрахь, арсурваврахь, душнихь, уссур-ссуннахь ва цинявппагу гъан-маччаминнахь. Алжан нясив баннав, гьав нурданул дуцIиннав, махъминнал оьрмурдай барачат бишиннав!

Ккуллал жямат


 

 


Рамазаннул арс ХIандайхъал Закир

Уттигъанну, цIуцIи шанийгу ивкIун, оьрмулул 77 шинаву аьпа­лухьхьун лавгунни уздансса зунттал чув, 1-мур ЦIувкIратусса ХIандайхъал Закир.

Увну ур Закир 1-мур ЦIувкI­рав 1940 шинал. Хъунмасса Буттал кIанттул цIанийсса дяъви байбишайхтува, ванал ппу Рамазан дяъвилийн лавгун ур, амма зана хьун кьисмат къавхьуну бур. Закиргу чIивину уна ятинну ливчIун ур. Шяравува лавгун ур школданийн, яла. ЧIяв школа-интернатгу був­ккуну, гава шинал заочнайну дуклан увххун ур Шяраваллил хозяйствалул институтравун. Дуклай унува, зун ивкIун ур заводрай МахIачкъалалив. Дагъусттаннай цалчин телевидение зий дайдирхьуния мукьах чIярусса шиннардий зий уссия микку операторну.

Закир уссия дакI-аьмал хъин­сса, гьарцаннащалагу авкьусса, ххаллилсса чув-адимина.
Закир ахиратрал шаврил хъун­насса кьурчIишиву кIи­дачIлай, жижара буллай буру ванал гъан-маччанахь, агьлу-ав­ладрахь цинявннахьвагу. Цал гьав нурданул дуцIиннав, алжаннул къапурду тIивтIуну лякъиннав. Амин!
Цалчинмур ЦIувкIуллал
жямат