Июнь зурул 18-нний агьали кьамул бунни АьФ-лул ПаччахIлугърал Думалул депутат Аьвдулмажид МахIрамовлул.
Имара Саидова
МахIачкъалалив ялапар хъанахъисса ПатIимат МахIаммадова бувкIун бия рецептрай цинма чивчусса инсулин ласун кумаг бара тIий. Ванил бувсунни кIива барз хьушиву инсулин тIалав бан къахъанай. Депутатнал, Республикалул ЦIуллу-сагъшиву дуруччаврил министерствалул дарурттал щаллу баврил отделданул хъунаманайн оьвкуну, тIалав бунни мугьлат бакъа масъала дузал баву.
ДепутатначIан бувкIсса Ахттиял райондалиясса Эмина Пашаевал мурад бия цила душ Дагъусттаннал медициналул университетравун дуклан тIайла буккансса хасъсса направление ласун кумаг бува тIисса. Ванил бувсунни цила душнил, марцIсса ххювардай дуклай, цимилгу райондалул ва республикалул олимпиадарттай хьхьичIунсса кIанттурду бувгьушиву. Ванил хIакъираву МахIрамовлул тапшур бунни ЦIуллу-сагъшиву дуруччаврил министерствалийн ходатайствалул чагъар чичин.
Мукунма ва кьини депутатнал кьамул бунни шяравусса поликлиникалул къатри дакьин даврил, къатта-къушлил шартIру къулай даврил, ихтияр дуруччай органнайн багьайсса ва цаймигу масъалартту дузал баврил хIакъираву кумаг бара тIисса инсанталгу.
