[dropcap]И[/dropcap]юнь зурул 4-нний Кку­ллал райондалул бакIчинал хъиривчу Давдиев Анатолийл каялушиврулу хьунни шяраваллал бакIчитуращалсса хьунабакьаву.

Шикку ххал бигьлай бия цила чIумал налогру дулаврил ва гай дузалну дикIаврин хас бувсса масъала. Ххал диргьуна мукунна райондалий дуклаки оьрчIал ОГЭ ва ЕГЭ дуллалисса тагьаргу. ОьрчIру экзаменну дуллай бусса бия, Ккуллал райондалий бакъа, Лакрал, УнцIукIуллал Гергебиллал районнайгу. Вай кIицI дур­сса районнайн оьрчIру биян буллалавриву транспортрал чулуха дахчичру хъанай дикIайшиву кIицI бувна УО-лул каялувчи ХIаммакуева Альбинал.

* * *
Июнь зурул 5-нний Ккуллал райондалул администрациялул залдануву хьунни райондалул школарттал 1-4-мур классирттал учительтуращал, оьрчIал багъирдал тарбиячитуращал, Аьрасатнал МЧС-рал къайгъурдацIун бавхIусса курсру-лекция.
«Дагъусттаннал республика дур аьрщи сукку шайсса кIанттай. Шикку мукунна шай чIяруну лекьлурду, щинал мугьалтту бувккун, ххуллурду, ламурду лавсъсса ишру. Шай цIу дагьаву. Мунияту учительтуран ва тарбиячитуран кIулну бикIан багьлагьиссар укунсса балардая цукун ххассал бан аьркинссарив оьрчIру ва хъуними», — куна райондалул ГО ва ЧС каялувчинал Мир Кьурбайтаевлул.
МахIачкъалалия бувкIсса ГКОУ РД «УМЦ по ГО и ЧС-рал» пишакартурал бувсуна, цIанасса техникалул хIалурдугу ишла дурну, апатIру къахьун цукун буруччин аьркинссарив инсантал. Лекциялух вичIи дирхьуми рязину ливчIунни.