Ниттил оьрмулул дарсру

[dropcap]И[/dropcap]юньдалул 6-нний ттул ниттин, Мурадова-Аьбдуллаева ПатIиматлун, хьунтIиссия 100 шин.


[dropcap]Г[/dropcap]ъазимахIаммадлул душ ПатIимат бувну бур 1918-ку шинал июньдалул 6-нний Гьун­чIукьатIрал шяраву. Буттал шяраву 7 классгу къуртал бувну, захIмат буллай бивкIун бур колхозраву. Ташулул хьуну бур 1938 шинал, Мурадов БадавинацIун цилвамур оьрму бавхIуну. Вайннал дянив хьуну бур 2 оьрчI – на ва ттул уссу Сулайман. Ппу зий ивкIссар ГьунчIукьатIрал школалий дарсру дихьлай, цаппара­сса хIаллай – школалул директорнугу.

Ттун 2 шин, Сулайманнун 2 барз къавхьуну, увцуну ур ппу дяъвилийн, амма махъунай зана хьун къанясивну бивкIун бия мунан. КIива оьрчIгу канихьну щащарну лирчIсса жул ниттихун багьну бур циняв къай­гъурду. Нину зий диркIссар личIи-личIисса давурттай: колхозраву, шяравусса интернат­рай цIигьурну, школалий уборщицану.
|
[dropcap]Б[/dropcap]игьану бакъахьунссия ниттин 2 оьрчI ччаннай бацIан буван, кIивагу оьрчIан пенсиялун дирхьусса 11 къурушрацIух. Дяъвилул оьрчIан хIукуматрал чулухасса кумагранни тIий, лях-карах селедка-хIавагу булайва, балугърал кьанкь дусса янна шюшай ссахIвангу булайва.

Ниттиуссу Анас Аьбдуллаевгу, мунал кулпатгу жул ниттил чIарав ххуйну бавцIуссар. Миннал рухIругу хъинний дишиннав, миннал оьрчIал оьрмурдай барачат бишиннав.
Ттул нину аьпалул хьунни ванияр 30 шинал хьхьичI. Муния­сса аьпарив жул дакIурдиву лагь къавхьуссар.

ЧIявуссаннаща къашай
Эбратрай оьрму бутан,
Давраннай къабивкIнугу,
Бусравсса цIа кьаритан.

Байсса къуццу вил ххуйя,
Бусай мукъуй цIу бия,
Хъирив наниминнахьгу
Оьрмулул дарс дишайва.

Чурххал бювхъусса бияв,
Канил даймур пагьинъя,
Уссурссуннал дяниву
МаслихIатрал ттарцI бияв.

Вил бунагьирттал аьпа баннав, гъан-маччанангу, чIахху-чIарахнангу ххирасса, гьарца дайсса давриву хIалу дусса, учайсса мукъуй, лаххайсса янналий цIу бусса, аьзизсса нину ПатIимат!

София ХIасанова,
ш. Каспийск
(ш. ГьунчIукьатIи)