ЦIуминалийсса ТIюхчардал школалий мукьилчин бивщунни махъва-махъсса гюнгутIи. ЦIанасса чIумал ТIюхчардал школалий дуклай бур 200-нийн бивсса оьрчIру. Гьашину 11 класс къуртал буллай ур 8 оьрчI, 9 класс къуртал буллай ур 18 оьрчI. Дуккавриву, спортраву ва жяматийсса давурттаву чIалачIи дурсса кка­ккиярттайн бувну, ТIюхчардал школа ккалли бувну бур райондалий яла хьхьичIунмур школалун. Мукунма ва бур республикалул хьхьичIунсса школарттал сияхIрайгу.

---

А. Аьбдуллаева
Махъва-махъсса гюнгутIул байран лахъа-хъун дан ва оьрчIахь ххуллухъин учин ТIюхчардал школалийн бувкIун бия ЦIуссалакрал райондалул администрациялул вакил Аьбидат Аьбдуллаева, ТIюх­чардал шяраваллил администрациялул хъунаманал хъиривчу ХIасан ХIасанов, чIярусса шиннардий школалий зий бивкIсса захIматрал ветеран ПатIимат Оьма­рова. Аьдатравун багьсса куццуй, оьрчIру барчагу бувну, ми экзаменнайн итабакьлакьисса хIукму бувккуна школалул директор ШайхахIмад Дадаевлул.

[dropcap]Я[/dropcap]ла дуккавриву, спортраву ва жяматийсса иширттаву ххуй­сса ккаккияртту чIалачIи дур­сса оьрчIан дуллуна грамотар­тту. Букъавсун къабучIир, вай цинявппагу оьрчIал райондалул ва республикалул олимпиадарттай, конкурсирттай, спортрал бяст-ччаллаву, ххув хьуну, кIи-кIира, шан-шанна наградартту лайкь дуршиву. Мукунна бахшишру дунни вай оьрчIащал зий бивкIсса учительтуран: ШайхахIмад Дадаевлун, ПатIимат Оьмарован, ХIажи Буттаевлун.

[dropcap]В[/dropcap]а школалий махъва-махъсса гюнгутIул байрандалий барча бувайссар юбилей дусса учительталгу. Гьашину барча бунни байбихьулул классирттал учитель Наидат МахIаммадовна.
Школалул коллективрал дуллалисса даврин лавайсса кьимат бишлашисса ва оьрчIахь ххуллухъин тIутIисса ихтилат бувна Аьбидат Аьбдуллаевалгу.

ТIюхчардал школалий выпускниктуран личIи-личIисса номинациярттай медаллу дуллалисса ххуйсса аьдатгу дур. Медаллу дарчIуна укунсса номинациярттай: «хъиншиврул ва иминшиврул тIиму», «аькьлулул кьулла», «классрал мусил чIу», «яла хIал бавкьума», «спортрал виричу», «классрал баргъ», «гьунардал ххазна».

[dropcap]Я[/dropcap]ларив хIасул хьуна ххариссагу, пашманссагу асарду хIала бувх­сса, оьрчIру учительтурая ва школалия личIи хъанахъисса махъва-махъсса гюнгутIи бишлашисса му­тта. ГюнгутIи бишлашийни, якьама бувккуна оьрчIругу, учительталгу.
Хъирив цахьра дарс дирхьу­сса учительтуран, миннахь барчаллагьгу увкуну, тIутIал кацIру буллунни выпускниктурал. Цинявннан асар хьунни выпускниктурал цалла суратру ларчIсса ва хъин-хъинсса махъру чивчусса ятIулсса къюкIлил макет классрал каялувчинан пишкаш даву.
Школа къуртал буллалисса оьрчIал дуллунни кIулшивурттал кIула ацIулчинмур классрал дуклаки оьрчIахьхьун.
Ахирданий, цинявппагу гъан хъанай, выпускниктурал гьухърай тIайлабацIуртту чIа тIисса чичрурдугу дуллай, дакIний личIансса суратру ришлай бия.