Ларгсса хамискьини ихIсандалул «Инсан» фондрачIасса «Лакия» отделениялул ттинин дурсса ва дуллалисса давурттая бусан «Илчилул» редакциялийн бувкIун бия ванил каялувшиву дуллалисса Ислам ХIажибуттаев ва пресс-службалул хъунама Ансар Сулайманов.

---

Залму АьбдурахIманова
Вай кIиягу жагьилсса, цала-цала касму-пишарду бусса жагьилтал бур Аллагьнал ххуллий укунсса рахIму-цIимилул давугу дачин дурну. Ислам ур КIундиннал шяраватусса жагьил. Ансарма ур Хъювхъиял шяраватусса. Фондрал ва отделениялул баян бувсса акциярттал чIумал вайннал лагма лагай­сса бур жула шаннагу райондалул щархъавасса сайки ххюцIалаксса жагьилтал-волонтерталгу. Жущалсса хьунабакьаврий Исламлул ва Ансардул гьарта-гьарзану бувсунни цала къайгъурдая ва мурадирттая.

Ислам ХIажибуттаев:
— Аьмну «Инсан» фондралгу, жул отделениялулгу шинай агьамсса шанна-мукьра акция сакин дувайссар. Ми хъанахъи­ссар «Гьарца къатлувун – дикI», «Гьарца къатлувун – дукия» тIисса ва цаймигу акцияртту. Акциялул агьаммур бутIа байбишиннин жу 10-15 гьантлул хьхьичI социал сетирдайхчIин баян байссар акциялунсса арцу ягу дуки-хIачIия датIлай сукку хьушиву. Шайнал дакI дирссаксса дуллусса арцух жу базаллува ласайссар цинявннан архIалсса, ца багьлунсса дуки-хIачIиялул пакетру. Базаллавусса жула миллатраясса даххултралгу жун ми хъинну къулайсса багьран дулай. Масалдаран, ттучаннай 700-800 къурушран бацIансса сурсатирттал (качар, чяй, ххя­ххиялул нагь ва цаймигу дукия) кьуцуру жун базаллуву 450 къурушран бацIай. Машан ларсмур жу ца кIанай жула волонтертуращал бутIрайх дачIайссар ва минналла цала-цала ягу цала чIаххуврайсса щархъавун диянгу дувайссар.

Жу жула счетрайн дуркIсса гьарца къурушрал жаваб дулай­ссар фондрал каялувшиндара­хьхьун. ЖучIанна дуркIсса арцух бурувгун, бувайссар шай­сса кумаг. Аьмну шаннагу жула райондалий жу кумаг бувай­сса 200-ксса кулпат бур. Ми хъанахъи­ссар ятинтал ва ахIвал-хIал кIюласса чIявусса оьрчIру бусса кулпатру. Цал архIал цинявннан кумаг бувансса каши жухь дакъахьувкун, жун багьай ца кварталданий цавайннан, гамур кварталданий гайминнан кумаг буван.

Шяраву кумаг аьркинсса кул­патирттал цIарду жухьхьун я школардай учительтурал ягу щархъал имамтурал дулайссар. Мисалдаран, «Кумаг бува ятиннан школалийн хIадур хьун» тIисса акциялул чIумал жу арцуйнусса кумаг бувайссар школалийн гьан хьхьичI аьркин­сса мюрш-кьюрш ласун. Ларгсса шинал Кьурбан-байрандалул гьантрай жу кIира тонна дикIул дарчIуссия.

Мукунна «Зякат» тIисса акциялул чIумалгу жуща ххуйсса кумаг буван бюхъай кулпатирттан. ДукIу му акциялул чIумал ца жула лаккучунал 150 азарда къуруш дуллуна ятинтал ва чIявусса оьрчIру бусса кулпатирттайх дачIин. Уттигъанну кумаг буварду Ваччатусса ятинтал хъуни буллалисса ца хъамитайпалун – бухсса, лекьавайсса къатта бакьин бан. Дан ччай дуна, дан къахъанахъисса давурттугу чансса дакъар. Ми дансса харж-хурж биялну ба­къахьувкун, къа­дурнура, къащаллу хьуннагу личIай цаппара давуртту. ЧIярусса къадучIарчагу, дучIай счетрайн арцу билаятрал цайми регионнай ялапар хъанахъисса жула лакраягу. Аллагьнал ххуллий гьарнан цала дуллумур дучIину лякъиннав.

Ансар Сулайманов:
— Жу дуллалисса акциярттащал кIул хьун бюхъайссар социал сетирдай. Хаснува fondinsan_lak тIисса профиль дуссар Инстаграмрай. Гиккура дуссар жул координатругу. Жул акциярттан ва чирилунсса давурттан арцу дичин ччинащагу бюхъайссар ва счетрайн дичин: 4276600048731810 ягу цIухху-бусу бан ччисса ухьурча, ва телефондалийн оьвчин: 8(963) 414-11-77.
ЖучIан захIматсса азардал бувгьусса халкьунналгу, кумаг чIа тIий, оьвчай. ХIарачат бувару жучIанна дуркIсса арцух кумаг бансса. ДукIу, мисалдаран, Ххюлусматусса ца хъамитайпалун ххуллун чан-кьансса кумаг бан бювхъуна. Москавлив квота дуну, гьарзат щаллуну дия ганил, так арцул чансса ссуссукьуну бия. Мукунма ЦIуссалаккуй бия лаккучунан хьусса яру хъамитайпа, ласгу лавгун, мяйва оьрчIащал лаякъатлува буккан буллай, 16 азарда къуруш дуллуссар ганин фондрал чулуха.

ЧIявур жучIан оьвчайсса, бучIайсса халкьуннал буру­кки­нну.
ЦIана жула миллатрал балайчитурахь, спортсментурахьгу тавакъю буварду цала-цала страницардайхчIин фондрал, хаснува жулламур отделениялул, чIарах бацIира тIий. Умуд бишин ччай бур жула миллатрал хъами-чиваркIгу чялишну гьуртту хъананшиврийн жу дуллалимунивух. Инсаннан ятинтурайх, миски-гъаривнайх цадакьалун дарчIумурнияр, дуллумурнияр хьхьичIунсса цамур зат да­къассар. Мури мунал имангу, исламгу, АллагьначIансса ххуллу-ххагу.