Лахъа-хъунсса даражалий

Лахъа-хъунну кIицI ларгунни март зурул 22-нний Гъумук халкьу­н­нал просвещениялул отличник, учитель-методист Нураттин Маммаевлул 90 шинал юбилей Хъунасса учитель дакIнийн утан бувкIун бия чIявусса бусравсса хъамал: Аьлишаев Мухтар, профессор (школалий ва МГУ-луву Нураттиннущал дуклай ивкIсса); ХIажи МахIаммадов, профессор; Альбина Арухова, ДР-лул кIулшиву дулаврил ва элмулул министр­нал хъиривчу; Низам Загьиров, ДГУ-рал пишакаршиву ларай дайсса факультетрал декан; Сулайман АхIмадов, профессор; Султан Мирзаев, физикалул ва математикалул элмурдалкандидат; Шагьимардан Мудуев, географиялул элмурдал доктор; МахIачкъала шагьрулул школарттай математикалул дарсру дихьлахьисса учительтал, Нураттин Маммаевлул гъан-маччами, дустал, гьалмахтал ва учениктал.


Зулайхат Тахакьаева
Юбилейран хас дурсса мероприятиярттал лагрулий хьунни личIи-личIисса шадлугъру: Нураттин Маммаевлул цIанийсса математикалул олимпиада, Ма­хIачкъалаллал шагьрулул школарттал дуклаки оьрчIругу гьур­ттусса; математикалул учительтурансса элмийсса ва методическийсса конференция; математикалул учительтурансса мастер-классру;Дагъусттаннал лайкь хьусса художник Буниямин Каллаевлул суратирттал ккаккия (цалгу къуртал бувсса Гъумучиял школа) ва м.ц.

Нураттин Маммаев зувира шинай дарс дихьлай ивкIсса Гъумучиял школалул чIирай лачIун дурунни аьпалул ула. Муния пардав ликкан тапшур бувну бия Нураттиннул арс, Да­гъусттаннал ПаччахIлугърал медакадемиялул ректор Сулайман Маммаевлуйн ва ДР-лул Хъунисриннал советрал хъунаманал хъиривчу Сиражуттин Илиясовлуйн.
Райондалул бакIчи Юсуп МахIаммадовлул кIицI лавгунни Гъумучиял школалия бувкшиву щалагу дунияллийх цIа ларгсса аьлимтал ва личIи-личIисса пишардал агьлу, цивгу, так ца Лак­рал райондалун бакъасса, щалагу Дагъусттаннал ва Аьрасатнал пахрулун лайкьсса.

— Учительнал пиша бур ца яла хьхьичIавасса ва гьарзаманнайра агьамшиву хъуннасса. Гъумучиял школалул учительтуран му пиша хьуссар оьрмулул мяънану. Мунил авадансса тарихрай яргсса хха чивчуссар математикалул учитель Нураттин Маммаевлулгу. Ганал дарс дирхьусса оьрчIава бувкссар щалагу билаятрай цIарду машгьур хьусса инсантал: аьлимтал, политикалул ва жяматрал ишккаккулт. КIицI данна цаппарассаннал цIарду: Имран Илиясов, элмурдал доктор, ХIасан Айгунов, профессор, Шагьимардан Мудуев, элмурдал доктор, Буниями Каллаев, Да­гъусттаннал лайкь хьусса художник ва чIявусса цаймигу.
Гъумучиял школалул директор Ххадижат ХIусниевал гьарта-гьарзасса ва дакIний личIансса ихтилат бувна Нураттин Маммаевлул оьрмулия ва захIматрал ххуллия.

Сиражуттин Илиясов:
— Гъумучиял школа хьуссар дунияллул гъунттулу Лакку улк­лул сий бюхттул дансса пишакартал тарбия бансса дуккаврил кюруну. Микку учительнал ттугъ бюхттулну лавсун най ивкIссар ттул ссурахъу Нураттин Маммаев. Дяъвилул махъсса захIматсса шиннардий, чIарах ацIансса инсангу акъана, так цала кIулшивурттайн ва биялалийн чул бивщуну, жула билаят­рай бакъасса, щала дунияллийва сий бюхттулсса Москавуллал паччахIлугърал университетрал ца яла захIматсса механикалул ва математикалул факультет хьхьичIунсса ккаккиярттащал къурталгу бувну, хъуншагьрулийра ххаллилсса даву лякъингу бюхълай бунува, махъунай ватандалийн зана хьуну, цала аьзизсса школалий зий айивхьуссар Нураттин. Му хъуннасса чувшивур. Муниятур шинну ларгун махъгу Нураттиннул цIа ванал учениктурал зумату щяв къадагьайсса.

Альбина Арухова:
— КутIасса оьрмулий Нура­ттин Маммаевлул ватандалий кьариртссар хъинсса цIа ва авадан­сса ирс. Лайкьсса ник тарбия дан хъунмасса захIмат бивхьуссар ванал республикалул лагрулий, учитель-методист хIисаврайгу. Лакрал район мудангу дуккавриву хьхьичIххуттай дур, мугу Нураттин Маммаевлул бувгьу­сса гьаннар.

Муния махъ райондалул Культуралул центрданий хьунни Н. Маммаевлул юбилейрацIун бавхIусса хъунмур мажлис. Му нани бувну ия «Илчи» кказитрал хъунама редактор Руслан Башаев.
Мажлисрал байбихьулий ккаккан дуруна цIанихсса педагогнал оьрмулун хас дурсса видеофильм.
Альбина Аруховал дурккуна республикалул кIулшиву дулаврил министр Уммупазил Оьмаровал цIаниясса адрес.
Министерствалул чулуха ХIурматрал грамотартту ва барчаллагьрал чагъарду буллуна математикалул учительтуран: Умамат Багъдуеван, Уммусалимат Шабанован, Зубалжат Къюннуеван, Юсупхан АмирхIамзаевлун, ПатIимат Байдуллаеван.

Олимпиадалий ххув хьусса ва хьхьичIунсса кIанттурду бувгьу­сса оьрчIан буллунни дипломру ва арцуйнусса бахшишру.
Юбилейран хас дурсса мероприятияртту сакин дурминнахь ва ппу дакIнийн утан бувкIцириннахь барчаллагь увкуна Нураттиннул арс Сулайман Маммаевлул. Ванал кIицI лавгуна райондалий сий хъуннасса буттал цIанил цивппа буржлув буллай бивкIшиву жяматраву лайкьсса кIану бугьан.
Райондалул чулуха Юсуп МахIаммадовлул Сулайман Мам­маевлун пишкаш дуруна сурат.

Гьарцагу райондалий хъанахъисса иширттал чIарав ба­цIаврихлу Сиражуттин Илиясовлун ва Ссапар Аьбдуллаевлун дуллуна ми кIиягу Лакрал райондалул хIурмат лавайсса инсанталну ккаккан буллалишиврул цIарду.
Мажлисрал байлитIулий ккаккан дуруна Дагъусттаннал камерный оркестрданул хъун дакъасса концерт.