[dropcap]Г[/dropcap]ьарца хIакиннан къабулай ххуйсса хъунама хIакин хьунсса бюхъу. КIулшивурттацIун бикIан аьркинну бур ялагу хасъсса аькьлу ва ляличIисса хасият: дакI хъиншиву, халкьуннахсса къулагъас, ссавур,жаваблувшинна ва цала даврийн дакI тIайлашиву. Цала пишалул агьамшиву кIулсса инсан тачIав нигьакъаусайссар захIматшивурттая. Муна мукунсса инсан ур республикалийгу, мунил кьатIувгу цIа кIулсса хирург Дибиров АьвдурахIин Дибирдул арс.
[dropcap]А[/dropcap]ьвдурахIин 13-мур школалийгу эбратранну дуклакисса оьрчI ивкIун ур. Математикалул, физикалул, ингилис мазрал дарсирдал олимпиадарттай мудангу хьхьичIунсса кIанттурду бугьайсса бивкIун бур. ХьхьичIун ливчусса ивкIун ур спортравугу. ХьхьичIунну школагу къуртал бувну, дуклан увххун ур Дагъусттаннал паччахIлугърал мединститутрал хъин бай факультетрайн. Ххуйну дуклай ушивруцIун зий ивкIун ур элмулул ва жяматийсса давурттахагу. Цала сакин бувсса докладирттащал гьуртту шайва элмийсса конференциярттай.
Барчаллагьрай дакIнийн бичлай ур АьвдурахIин Дибирович цахьра дарс дирхьусса учительтал: А. ХIамидов, Р. Мажидов, Д. Далгат, доцент Ю. Куликов.
ЯтIул дипломращал институт къуртал бувсса жагьилсса хIакин тIайла увккун ур Грознай шагьрулул 4-мур азарханалий зун. Тийх дус хьуну ур цала ватанлув Багьауттин Аьлиевлущал. «Ганаяр ттун лархьхьусса хирургиялул кьюлтIшивуртту ва аькьилшивуртту. ЧIиви оьрчIай бурчу баххана бувсса операциялия махъ ганал ттухьва увкусса «молодец» тIисса махъ ливчIссар ттул дакIниву яла бюхттулмур кьиматну. «Гьарцанная бюхъаймур лахьхьи» тIисса ганал маслихIат на бусса оьрмулий ишла буллай ура ттула оьрмулуву.
Яла АьвдурахIин Дибирович зий ивкIссар Гудермесрай. «Тийхри ттуя хIакьсса хирург хьусса», — учай ванал. Цала увкумур мяйжан бан бувцунни ва мисал. «Ца базилух цалчинмур майрал кьини цинявппа хIакинтал даврил уртакьнал жижаралий лавгун, больницалий увагу ца на ияв ливчIун. Ряхра шин хьусса оьрчIал аппендицитрай операция буллай айишавайсса лахIзалий кIива машиналий лавсун бувкIунни апатIраву кIусса щавурду дирсса ряха инсан, анаварну операция бан багьлагьисса. Заннайн щукру, оьрчIал оьрмулун хъуннасса нигьачIаву дакъар куну, ганай бансса операция махъун бувтун, ттула бусса гужгу цачIун бувну, анаварсса мутталий операцияртту бувну, шама инсан бивкIулуща ххассал ан бювхъуна ттуща».
АьвдурахIин 23 шинай зий ивкIун ур И. Пироговлул цIанийсса Москавуллал 1-мур азарханалий элмийсса зузалану ва хирургну.
2013 шинал АьвдурахIин зана хьуну ур Дагъусттаннайн, Лакрал райондалул азарханалул хъунама хIакинну зун. КутIасса чIумул мутталий ванал шяраваллил кIанттайсса цIуллу-сагъшиву дуруччаву лайкьсса даражалийн гьаз дурну дур, азарханалул къатри гьануцIакул дакьин дурну, цIусса оборудование дучIан дурну, цIусса жагьилсса хIакинтал бучIан бувну бур. ЧIахху-чIарахсса районная бакъасса, Аьрасатнал шагьрурдаягума Гъумукун операцияртту бан инсантал букIлай бивкIун бур.
2017 шинал Дагъусттаннал цIуллу-сагъшиву дуруччаврил министр Танка Ибрагьимовлул тавакъю бувну, АьвдурахIин Дибиров авцIунни Каспийск шагьрулул азарханалул хъунама хIакинну. Ва азархана ккаллину бур республикалий ца яла хъунмассаннун – 479 тахчалунсса. Зий ур шикку 1500 зузала, миннава – 311 хIакин. Амма цуппа азархана ххуйсса тагьарданий къабивкIун бур. АьвдурахIин Дибировлул министрнахьхьун махъ буллуну бур шин ва дачIиннул мутталий азархана лайкьсса даражалийн буцин.
«Ттул агьаммур мурад бия ххуйсса пишакартал кIункIу бан. Анаварну ремонт дан багьлай бур оьрчI байсса ва туберкулезрал отделениярттай, оьрчIал поликлиникалий. Лахъан багьлай бур 70 миллиондалийн бивсса бурж. Мурадру биттур бан захIматсса бур, амма кьаст лахIарча, биттур бан къашайсса мурад къабикIайссар.
АьвдурахIин Дибировлул бур хъинну бавкьусса кулпат, захIмат ххирасса оьрчIру. Хъунмур душ Тамара, лор-хIакин, зий бур дазул кьатIув. КIилчинмур душ Суна, оьрчIал хIакин, зий бур Москавлив Рогачевлул цIанийсса центрданий, арс Ибрагьим дуклай ур школалий.
Жаваблувшинна хъуннасса хIакиннал даврицIун АьвдурахIин лап шавкь дуну дуллай ур жяматийсса давугу. Ванал сипталийну сакин дурну дур «Гъази-Гъумучи» тIисса жяматийсса фонд, цилгу чулийн буккан буллалисса лакрал миллатрацIун бавхIусса чIявусса мурадру.
ХIакьину Дагъусттаннан аьркинну бур, АьвдурахIин кунма, пишалийн дакI тIайласса хIакинтал.
Нури Нуриев
