Уттигъанну Ваччиял школалий хьунни «Ниттил мазрал нюжмарданун» хас бувсса мажлис. Шикку гьуртту хьунни «ЧаннацIуку» кказитрал редактор АбрикI Къянчиев, шаэр Ися МахIаммадов, Ваччиял школалул ниттил мазрал учитель ХIусайн ХIусайнов, школалул дуклаки оьрчIру, учительтал, культуралул зузалт.
Цува ва мажлисрайн учIан къашаврийн бувну, Дагъусттаннал Чичултрал союзрал лакрал секциялул каялувчи Илияс МахIаммадовлул гьан бувну бия видеоролик, му ккаккан бувна экрандалий.
Мажлисрай лакку мазран хас бувсса шеърирду бувккуна, балайрду увкуна, къавтIун бивзуна Ваччиял школалул 3-мур ва 11-мур классрал оьрчIру. Культуралул зузалтрал ккаккан дурна концерт. Миннавух бия: Кьурбан Аьлибеков, Асият МахIаммадова, Гулжагьра Рамазанова,
Шавлухъ СалихIова. Укунсса мажлисру, хьунабакьавуртту чIа-чIаннин дулларча, бюхъайхха ниттил мазрал чулухуннайсса ччаву гьарта-гьарза хьун.
