[dropcap]М[/dropcap]арт зурул 19-нний Дагъусттаннал региондалийсса «Единая Россия» партиялул председатель Дмитрий Медведевлул приемнайлуву агьали кьамул бунни АьФ-лул Думалул депутат Аьвдулмажид МахIрамовлул.
Имара Саидова
Буйнакс шагьрулийсса Авгъантурал паркравусса интернационалистурансса гьайкал дакьин дан кабакьу баврихлу депутатнахь барчаллагь учин бувкIун бия Авгъантурал союзрал члентал.
Авгъаннал дяъвилул ветеран Муршид АьвдулхIусайновлул бувсунни, дяъвилий цIунцIия дирну, мушакъатшиврул пенсия бишин къабюхълай ушиву. Депутатнал ванал масъалалул хIакъираву хъирив бизан тапшур бунни цала кумагчитурайн.
МахIачкъалалив ялапар хъанахъисса Захар Элумов увкIун ия дурухлурдал азарданун уква итабакьин ккаккан бувсса дарув ласун кумаг бара тIий. Ванал бувсунни, анаварну аьркин багьлагьисса даруртту къабуллай, инжит буллай бушиву къашайшалт. МахIрамовлул ванал масъала гава ссят Республикалул ЦIуллу-сагъшиву дуруччаврил министерствалийн оьвкуну, анаварсса мутталий дузал баву тIалав бунни.
Хъунзахъиял райондалиясса МахIаммад Абакаров увкIун ия шяраваллил хозяйствалун итадакьин ккаккан дурсса грант ласаврил масъалалул хIакъираву кумаг бува тIий. Депутатнал маслихIат ккавккунни, аьркинсса цинявппа документругу дузал бувну, грантирдал хIакъиравусса программалувун буххансса аьрза чичин. Цала чулухагу махъ буллунни му масъала аякьалийн ласун.
Мукунма, МахIрамовлул цаппарассаннан кумаг бунни ттукIрасса тIайла бакъасса буржру яла бичин.
Цинявппагу цачIанма бувкIсса агьалинал масъаларттал хIакъираву бунни хасъсса маслихIатру ва цала кумагчитурайн тапшур бунни ми щаллу баврил ялув бацIан.
