[dropcap]Ф[/dropcap]евральданул 10-нний ДР-лул БакIчинал кIанайма Владимир Васильевлул ва АьФ-лул Генеральный прокурор Юрий Чайкал МахIачкъалалив дунни батIаву. Муний АьФ-лул Генпрокуратуралул комиссиялул дунни республикалий законшиндарал тагьар ххал дигьлагьисса давурттал хIасиллу ва региондалул прокуратуралул зузалтран ккаккан увунни цIусса каялувчи – Денис Попов.

[dropcap]Д[/dropcap]енис Поповлул бувсунни дакI дарцIуну ушиву республикалул прокуратуралуща цила хьхьичIсса масъалартту дузрайн буккан бан бюхъаншиврий.
Дагъусттаннай дуллалисса хъиривлаявурттал хIасиллая бувсунни Аьрасатнал Генпрокурорнал хъиривчу Иван Сыдоруклул. Мунал бусаврийн бувну, хъиривлаявурттайну ашкара дурну дур сайки 2500 закон лиян даву, миннул хIасиллайну бачин бувну бур 70 силистта. «Генпрокуратуралул комиссиялул ашкара дурну дур 2431 закон лияндаву, чирчуну дур 8 закон лияндаврил хьхьичIалу кьукьин аьркиншиврул хIакъиравусса справка, 170 протест, бачин бувну бур 71 силистта ва 433 административ закон лиян даврицIун бавхIусса силистта», — увкунни Иван Сыдоруклул.
Иван Сыдоруклул мукунма бувсунни ашкара бувну бушиву республикалул ялапарлувтуран­сса газрал ва токрал тарифру лахъ бувсса ишру, хIаллихшинну лайкьну къадуллай бивкIшиву, токрал сетьру кугьна хьуну душиву, 70 процентрал энергия ххишала­сса харж хъанай диркIшиву. КIира шин ва ххишаласса мутталий республикалий биттур къадуллай бивкIун бур энергосбережениялул программа.
«Тамансса закон лияндавуртту хьун дурну дур «Газпром межрегионгаз МахIачкъала» ОАО-рал давурттавугу.
Дагъусттаннал БакIчинал кIанайма Владимир Васильевлул республикалул циняв министерстварттал ва ведомстварттал каялувчитурая тIалав бунни ашкара дурсса циняв диялдакъашивуртту духлаган дуван. Мунал мукунма бувсунни цIуну къуллу­гъирттай битлатиминнал миллат хIисавравун къаласавантIишиву. «ХIисавравун ласавантIиссар так даву кIулну дикIаву. Жу цIана марцI хъанай буру лулттура­сса ласултрацIа ва дацултрацIа», — увкунни В. Васильевлул.
Республикалул каялувчинал СМИ-луйн тапшур бунни ми иширттаву цацIунма чялишну кабакьлан.
Юрий Чайкал надзорданул къуллугъирттайн тапшур бунни региондалий коррупциялийн къаршисса давуртту гужлан дуван, республикалул прокуратуралул органнайн тапшур бунни социал субсидияртту бачIаврил ишир­ттах ляличIину къулагъас дуллан. Мунал мукунма тапшур бунни кIул бан хъуни къуллугъчитурал чIалъаь къатри ссах дурну дуссарив ва ми закондалийну дурну ду­ссарив ягу дакъассарив.