Азардахъул шинну ларгунни НукIузаманнул грекуллал цалчинсса олимпий тIуркIурду сакин бувну. Тайннул гьанулий 1896 шинал барон Пьер де Кубертеннул уттава буккан бувссар олимпий тIуркIурду. «Политикалул ва спортрал дазу кьянкьану рищун аьркинссар», — тIий уссия Пьер де Кубертен. Ци учирчагу, политика ва спорт, лас ва щар кунма, хъатлий хъат дирхьуну, архIал бавчунни политикалул ва спортрал ххуллийх. Ччарчан паччахIлугъру цирда рязи къархьунни олимпий тIуркIурдай гьуртту хьун (бойкот), ччарча олимпий комитетрал миннайн къаоьвкунни.

Анверлен – 1920
ва Париж – 1924

1920 шинал олимпий тIур­кIурдай хъамалу къавхьуссар Цалчинмур дунияллул дяъви байбивхьусса Германия ва вайннал чIарав бавцIуми – Австрия, Венгрия, Турция, Болгария. Къаоьвкуссар Аьрасатнайнгу, революция ва хIукумат даххана шаву сававну. Яла, оьвтIий бунугу, СССР-данул 1952 шинайннин олимпий тIуркIурдай гьурттушиву къадурссар.
1924 шиналгу хъамалу къа­оьвкуссар Германнал хIуку­мат­райн, гава Цалчинмур дунияллул дяъви сававну.

Мельбурн – 1956

Олимпий тIуркIурдай гьур­тту къавхьуссар, байкот баян бувну, Нидерландуллал, Испаниянвл ва Швейцариянал паччахIлугъру, Венгриянавусса бунт СССР-данул ккуччу даву сававну. ТIур­кIурдайн къабувкIссар Египетнал, Иракьнал, Ливаннал ва Камбоджинал паччахIлугърал командартту, Суэцрал каналданул ялувсса питнарду сававну. Китайнал командагу къадуркIссар, Тайваньнайнгу оьвкуну буну тIий.

Москав – 1980

Байкот баян бувну, Мос­кавливсса олимпиадалийн къа­дуркI­ссар 64 паччахIлугъ, савав – Авгъаннайн ххявхсса Совет аьрал.

Лос-Анджелес – 1984

Социализмалул ххуллийх нанисса паччахIлугъру къаларг­ссар олимпий тIуркIурдайн (Китай, Румыния ва Югославия личIаннин).
Багьана – США-нал Совет Союзрайн къаршисса тIуллу ва давуртту.

Пченчхан – 2018

Допинг сававну бяст-ччаллавух гьуртту хьунсса ихтияр дуллуссар Аьрасатнал командалувасса увагу 169 спортсменнахьхьун.

КIинтнил олимпий тIур­кIурдай уттинин гьуртту къавхьуссар дагъусттанлувтал. Жулла республикалий бакъассар цавагу кIинтнил спортрал журалул федерация.
Аьрасатнаву бур спортрал кIинт­нил журардаву Дагъус­ттаннал миллатирттава бувксса спортсментал – керлинграй, хо­ккейрай ва фигурни катаниялий лахъсса даражалул шачIанттайн лавхъсса. Миннавух ур лаккучу – Хъусращатусса Мурад Кьурбановгу, чIава жагьилтурал дянивсса Аьрасатнал чемпион ва Гран-прирал призер.

Р. Къардашов