Хъунасса лаккучу, ттуршра шинал мутталий цал цIа лакрал миллатрал зумату щяв къадагьлагьисса инсан, революционер, шаэр, драматург, публицист, халкьуннал тархъаншиврул цIаний нигь цирив къакIулну талай ивкIсса зунтталчу, жула бучIантIимунихлу цала жагьилсса оьрму кьурван бувсса инсан. Укунсса чумартсса инсантал рахли бакъа дунияллийн къабуккайссар. Амма жула лакрал алши бакъашиву ци дур учирча, муданнагу жуйнна дур ттупанграл къуннагъ пIякь тIий.
[dropcap]М[/dropcap]уна му къуннагъ пIякь увкунни ттуйнгу январь зурул махъра-махъсса тталаткьини. 2017-ку шинал ттуршра шин бартларгссар Гьарун Саэдовлул итабакьлай ивкIсса «Илчи» кказит буклай бивкIния шиннай. Ттул ихтилатгу ванаятур. Вай шиннардин хас бувсса журнал итабакьлай бушиврийн бувну, ттуйн «Илчи» кказитрал хъунама редактор Руслан Башаевлул тапшур бувна Ваччиял шяравусса Гьарун Саэдовлул къатрал ва кIялазурул суратру рищун. Нагу лавгссияв му мурад бартбигьин кIицI дурсса тталаткьини.
Пашмансса сурат! Ттун вай Гьарун Саэдовлул къатри ккаркссия хьхьичIрагу, 2014-ку шинал. Га чIумал ккаркссаннияр хъиннура яргсса пашмансса сурат дия – лакрал хъунасса арс увсса къатри чин ккаккан дансса даражалий дакъар. Чунни буцинтIисса школалул оьрчIру? Ва хъанай бур миллатрал тарих. Яла ттунма махIаттал бивзсса иш ци хьуна учирча, ганиннин ххуйну суратру ришлай бивкIсса ттул фотоаппаратрал батареяртту щябивкIун, къатрал сурат рищун къахъанай, цIусса батареяртту бишин багьуна. Къаччай бухьунссия Аллагьнан ва пашмансса къатрал сурат инсантуран ххал хьуну. Ттуллив ххи банмур бакъар.
