[dropcap]А[/dropcap]ькьлу тарбия байсса аькьлулулли, намус – намусралли. Ва калима хIасул шай бакIраву, жухь, Гъумучиял школалул 10-мур классраву дуклай бивкIсса оьрчIахь, дарс дишин тIайла авцIусса, жул классрал каялувчинугу ивкIсса, учитель Нураттин МахIаммадович Маммаев дакIнийн агьайтари.
[dropcap]М[/dropcap]оскавуллал М. Ломоносовлул цIанийсса университет ххаллилну къуртал бувсса чувнаща, щак бакъа, бюхълай бивкIссар муния гихунайгу ачин – аьлимчунал ххуллийх. Амма, жул талихIиндаран, му увкIун ия дарс дихьлан жула Лакку билаятрайн. Цала пиша ххирасса учитель – му ххуйсса учителли. Мунищала архIал вила ученикталгу ххирасса бухьурча – му хъинну камилсса учителли.
Нураттин МахIаммадовичлул хъиннура хъуннасса къулагъас дайва физикалул ва математикалул чулийнмай гъира бусса оьрчIах. Жул шяраватусса (Ххюлусматусса) оьрчIангу циваннив му дисциплина ххишалану ххирасса дикIайва, миннаватусса чIявуми хьугу-хьуссар яла цIа дусса математиктал, физиктал, инженертал. Миннал мудангу барчаллагьрай ва кьадру-кьиматрай дакIнийн утайва цахьра му дисциплиналул дарсру дихьлай ивкIсса учитель.
Жу, 1961-ку шинал Гъумучиял дянивмур даражалул школа къуртал бувсса выпускниктал, 2011-кусса шинал, цачIун бавтIун, кIицI ларгссия тания шиннай хьусса 50 шин. ДакIнийнгу дичлай буссияв дуккаврил шинну, учительтал, тарбиячитал. Жу хIисав дуллай, 1961-кусса шиналсса выпускниктурая цинявнная хьуну бия лайкьсса инсантал, цаягу лавгун акъая бавккусса, бяйкьусса ххуллийх. Му мукун хьушиврул цалчинсса сававчиталнугу бивкIссар жул учительтал, миннавух ивкIссар ляличIинува итталу ацIлацIисса Нураттин МахIаммадовичгу.
Ца чIумал, дунияллийх цIа дурксса аьлимчу-философначIангу гъан хьуну, ца жагъаласса биографиягу бусса инсаннал куну бур: «Ина ура хъунасса аьлимчу, аькьилсса инсан. Амма ттуща бюхълай бур вил учениктал бигьанма ттула чулийнмай кIура баен буван. Му ссигъа вин аьжаив къабизайрив?» — куну. «Микку цукунчIавсса ссигъа бакъассар, — куну бур жавабран аьлимчунал. – На ура, ттущава бювхъуссаксса, инсантал лахъну гьаз буллай, ина тIурча, ура, вищава бювхъуссаксса, инсантал лагьну битан ччай». Нураттин МахIаммадович личIантIиссар жула кIулшилуву цала учениктал бювхъуссаксса лахъну гьаз буллай ивкIсса учительну ва тарбиячину.
Арсен МахIаммадов,
профессор.
ш. Ххюлуссун
