Ниттил мазрайх кьини дуклакисса цанни?

Ларгсса нюжмар кьини Дагъусттаннал паччахIлугърал педагогический университетрал конференц-залдануву «Лакку маз буруччаву ва хьхьичIунмай баву» тIисса цIанилу гьарта-гьарзасса форум-батIаву хьунни.Хъуннасса мяъна цивунна ларсъсса форумрал цIанилва буслайгу бур ци мурадирай, ци буруккинттащал бавтIун бивкIун бурив шиккун халкь.


Залму АьбдурахIманова
[dropcap]В[/dropcap]аний гьуртту хьунни жуна чIявучин бусравсса ва уттигъанну щурущи дурсса Аьли Къаяевлул цIанийсса фондрал хъунама Амучи Амуттинов, фондрал хъунаманал хъиривчу, аьлимчу Илияс Къаяев, филологиялул элмурдал кандидат Роза Эльдарова, «ЦIубарз» журналданул редактор Хизри Илиясов, тарихрал элмурдал доктор АхIмад Кьурбанов, Культуралул зузалт­рал профсоюзрал каялувчи Марзижат Буттаева, Дагъусттаннал халкьуннал чичу Ссугъури Увайсов, тарихрал элмурдал кандидат Сулайман Мусаев, Гьарун Саэдовлул цIанийсса жяматийсса сакиншиндарал хъунама Давди Увайсов, ДГПУ-лул дагъусттаннал филологиялул факультетрайсса лакку мазрал отделениялул преподавательтал, студентътал, ишбажаранчитал ва цаймигу. Форумрал давривух мукуна гьуртту хьун увкIун ия Лакрал райондалул кIулшивуртту дулаврил управлениялул хъунама Явсупа ХIамзаевгу.
БатIаву тIитIлай, Амучи Аму­ттиновлул кIицI лавгунни хIакьину каши дусса, Ватан ххирасса гьарцагу лаккучунал бурж бушиву ниттил маз буруччаврил цIаний дуллалисса давурттавух гьуртту хьун, шаймунил чIарах ацIан.
«Лакку маз буруччавриву ттун ттунна цалчинна-цалчин дан багьлагьисса давуну чIалай дия лакку мазраха, ниттил маз буруччавриха зун цала пишану язи бувгьусса студентътурал чIарав бацIаврия айишин. Жу, маслихIатгу ккав­ккун, икьрал дурссия ва университетрал дагъусттаннал филологиялул факультетрайн дуклан бувхсса, марцIсса ххювардай цалчинмур семестр къуртал бувсса студентнан Аь. Къаяевлул цIанийсса фондрал чулуха­сса стипендия булун. Гьарца зуруй 5 азарда къуруш фондрал чулуха дуллантIиссар дуккавриву хIарачат буллалиминнан.
Ва бакъасса, жу жущава шайсса кумаг бувантIиссар лакрал кказитран бикIу, театр-радиолун бикIу, школардай дарсру дихьлахьисса лакку мазрал учительтурангу» , — увкунни, Амуттиновлул.
Хъирив ванал, барчагу бувну, фондрал чулухасса диплом ва цIа кусса стипендия буллунни ххювардай цалчинмур семестр къуртал бувсса 1-мур курсрал студентка ХIапизова Аьйшан.
Лакку маз буруччаврин хасъсса, хIакьину щархъал школарттайсса тагьарданиясса ихтилат бувунни Явсупа ХIамзаевлул. Цала мукъуву ванал чIурчIав дурунни уттизаманнул тIалавшиннардайсса дарсру дихьланшиврул щархъал школарттай биялну бакъашиву ниттил мазрал дарсирдансса луттирду ва учительтурал ишла дувансса литературалул, методикалул материаллу.
Мукунма форумрай ниттил маз буруччаврицIун ва аьмну мазран хасну дуллалисса давурттая бусласисса махъру лавхъунни Сулайман Мусаевлул, Алексей ХIажиевлул, АхIмад Кьурбановлул, Илияс Къапиевлул, Ссугъури Увайсовлул, Давди Увайсовлул, Тахо-Годил цIанийсса педагогикалул институт­рал элмулул пишакар Светлана Мутаевал ва цайминнал.
Роза Эльдаровал кIицI бувунни, лакку маз буруччаврия гъалгъа тIийни, хьхьичIва-хьхьичI байбишин аьркиншиву шяраву школар­ттай, оьрчIал багъирдаву, районнай­сса къуллугъчитурал батIавурттай ци мазрай гъалгъа тIий бурив ххал баврия.
«Инсантал цала ниттил мазрай гъалгъа къатIисса чIумал, му маз щищачIав ххассал бан къашай­ссар. Щилли лакку маз буруччин аьркинсса, лакрал циняр мероприятиярттай, школарттай, идарар­ттай оьрус мазрай гъалгъа тIийни? Нитти-буттал лахьхьин къабувсса маз щилчIав лахьхьин къабайссар», — увкунни ванил.
Шагьрулул школарттай лакку мазрал дарсру дишаврил масъаларттая шикку мукунма бувсунни МахIачкъалаллал 16-мур школалул учительница ПатIимат Аьлиевал.
ДГПУ-лул дагъусттаннал филологиялул факультетрайсса лакралмур отделениялул преподаватель Римляна Мударисовал бувсунни цIана отделениялий ххювагу курсирай ккалай ушиву аьмну 16 студент ва шиная шинайн шиккун бухлахими чан хъанай бушиву.
Форумрал ахирданий, циняв цачIусса суратгу рирщуну, батIаврил сакиншинначитурал оьвкуна гьурттучитурайн хъун бакъа­сса, нахIу-нацIушивурттал ва чяйлул ссупралухун.