Криминалданул хаварду

Гиччава гиккун

[dropcap]Ф[/dropcap]евраль зурул 12-нний полициялул зузалтрал кIул бувну бур Хасавюртуллал райондалийсса Гоксувотар шярава­сса цаннал январь зурул 18-нния хIакьинусса кьининин газ нани­сса бургъулува шяравусса теплицалувунгаз бувцуну ивкIшиву.Укун бавцусса газрайну энергетикалул компаниялун 87 азарда къурушрансса зарал бивну бур.
Ва иширал хIакъираву материал дартIун дур.

Бацав машина – дула жаваб

[dropcap]Ф[/dropcap]евраль зурул 12-нний Дагъусттаннал ГИБДД-лул хху­ллул патрульданул зузалтран Шамхал-Термен поселокрай Молодежная тIисса кучалий ялапар хъанахъисса 52 шинавусса адаминачIа лявкъуну бур федерал лагрулий лякъин баян бувну бивкIсса «ВАЗ-21093» машина.

Дакъассарив апатIран пал?

[dropcap]Ф[/dropcap]евраль зурул 12-нний ссят 06.45 хьусса чIумал ЦIуссалакрал райондалий хьусса ДТП-лий инсан ивкIуну ур. Гудермес шагьрулиясса (ЧР) 52 шинавусса адамина хьунив ххуллийн увккун, щун бувну бур «Тойота-Королла» машиналийн. Ва бачин бувну ивкIун ур Хасавюртуллал райондалийсса Бомматюрт шяравасса 55 шинавусса адамина.
Щун бувма «ВИС-23472» машиналий най ивкIун ур, цувагу гиккува къуртал хьуну ур. «Тойота Королла» машиналул щупир ва мунал кIия пассажир, цIунцIияртту хьуну, Хасавюртуллал азарханалийн биян бувну бур.

Телефондалул цIаний чIила щун багьарча!

[dropcap]Ф[/dropcap]евраль зурул 12-нний ссят 21.30 хьусса чIумал полициялул дежурнай частьрайн аьрзирай увкIун ур 52 шинавусса адамина. Ссят 19.00 хьусса чIумал МахIачкъалалив Агъачауллал кучалий цала къатрал чIарав цу уссарив къакIулсса инсаннал ванайн чIила щуну дур, цувагу, 15 азарда къурушрансса ванал «Самсунг Гелакси» телефонгу ларсун, ливхъун ур. Хъиривлаявуртту дурну, полициялул зузалтрал кIул увну ца гьантлува увгьуну ур тахсир хьума. Ва ур Агъачауллаясса 43 шинаву­сса адамина. Ва мукIру хьуну ур. Телефон зерххуну дур. Ва иширал хIакъираву АьФ-лул УК-рал 162-мур статьялийн дагьайсса уголов дело сукку дурну дур.
Укунсса тахсир хьусса инсаннан байсса яла цIакьмур танмихI бур 8 шинайсса дуснакь аву.

Яла кьянкьамур танмихI – кIира шин

[dropcap]Ф[/dropcap]евраль зурул 11-нний, ссят 15.35 хьусса чIумал, Сергокъалаллал райондалий увгьуну ур, ихтияр зерххуну дунура, хIангу хIарчIун, машиналий най ивкIсса, Ккурттаннал шяравасса 49 шинавусса адамина.
Ва иширал хIакъираву су­кку дурну дур АьФ-лул УК-рал 264.1 статьялийн дагьайсса уголов дело. Укунсса тахсир хьусса инсаннан байсса яла кьянкьамур танмихI бур 2 шинай дуснакь аву.

Малихулия айсса марихуана

[dropcap]Ф[/dropcap]евраль зурул 10-нний МахIачкъалалив Ахъушинскийл цIанийсса кучалия полициялул отделданийн увцуну бувкIсса 24 шинавусса жагьилначIа цIухла бивхьуну, ляркъуну дур 12,18 гр. марихуаналул. Ва иширал хIакъираву АьФ-лул УК-рал 228-мур статьялул 1-мур бутIуйн дагьайсса уголов дело сукку дурну дур. Укунсса тахсир хьу­сса инсаннансса яла кьянкьамур танмихI бур 3 шинай дуснакь аву.

Оьттулучу улара тIий бивкIун бур

[dropcap]А[/dropcap]хттиял шяраву ОМВД-лул къатрачIан шяравучу оьрмулуцIа увсса оьттулучу улара тIисса тIалавшиннаращал бувккун бур шяраваллил жямат.
ОМВД-лул каялувчитурал бувчIинбавуртту дурну махъ жямат ппив хьуну бур. Низамрава бувксса кIанттурду къавхьуну бур.
Дагъусттаннал МВД-лул пресс-служба