Лакку улча машгьур буллай бур спортраву хъуни-хъунисса хьхьичIуннайшивуртту ккаккан дуллалисса жагьилтуралгу.Мукунминнавасса ца яргсса вакилну ур Буршиял шяравасса Рамазаннул ва Ххюлуссуннал шяравассаЗайнаблул арс Ислам МахIачев – спортсмен, хIала-ккаласса стильданул пишакарсса ию (боец), аьрали самболул Аьрасатнал ва дунияллул чемпион. Уттигъанну, январьданул 21-нний, Американаву, Бостоннай, «TD Garden» ареналий хьу­сса Бразилиянал боец Глейсон Тибаущалсса дандиуккавривугу Ислам МахIачевлул ххувшаву ларсун, ххари бунни цала гъан-маччами, дустал, лакрал миллат, щалвагу Да­гъусттан ва Аьрасат.
Бадрижамал Аьлиева
Увну ур Ислам МахIачкъалалив 1991 шинал октябрьданул 27-нний. Цанна кIулши хьуния махъ спорт ххира хьусса Ислам школа бувккуну махъ ДГПУ-лул физкультуралул факультетрайн увххун ур. ЦIанасса чIумал Ислам заочнайну дуклай ур Москавлив, Г. Плехановлул цIанийсса Аьрасатнал экономикалул университетраву. Жагьилсса оьр­мулух къаурувгун, Ислам ухлай ур дунияллул даражалийсса бунияласса спортсментурал кьюкьлувун. Ларай кIицI ларгми цIарду дакъа­сса, ва хъанахъиссар самболул Аьра­сатнал шамийла чемпионгу.
Исламлул ур ца уссу, Кьурванисмяил, цаяра хъунасса. Мугу чIивинийва спортрахун агьну ивкIун ур, цIанасса чIумал му цанна чIунлахъиялун занай ур спортрал секциярттайн, Ислам тIурча ур профессионал.
Исламлул ппу Рамазан зий ур «МахIачкъала-Хушет» маршрут­рай пассажиртал ххилай. Нину Зайнаб хьхьичIва зий бивкIун бур цIигьурну, цIана шаппах бур. Вайннал бур лагма-ялттунащал бавкьу­сса, нахIусса кулпат.
Шагьрулий увну, шагьрулий хъуна хьуну, школагу шагьрулийва бувккуну бунугу, Исламлун ххуйну кIулну бур лакку маз. Ванан хъинну ххирар Лакку билаят. Гьарца каникуллай шяравун чара бакъа хъуни ттаттахъачIан-бавахъачIан Буршайн ва Ххюлусмав ияйсса ивкIун ур.
Исламлун хъинну ххирар цала ниттил нину ПатIимат цачIанна дуцаван. «Къатлувун ухханнина цIухлай уссар Ислам амудада чуври тIий», – буслай бур Исламлул ни­ттирссу Аьлият.
Исламлул цIанагу хIарачат бувай сант дирирсса гьантта Ла­ккуй гьан баван. Буллай байбивхьуну, махъ бавцIуну бивкIсса Буршиял шяравусса мизит Исламлул хIарачатрайну дукIу бувну бакIуйн бувкссар, лагма лаган бувну Буршиял ва цаймигу жагьилталгу, шинал мутталий щирикIин дурну давуртту.
Шиккува бусан, цала чIяру дакъасса оьрмулул шиннаву Исламлул кIийлва бувну бур хIаж. ТIайлар, хIаж – му гьарцагу бусурманчунал цахлува биттур бувайсса бурж бур, бунугу, ттун ва кIанугу кIицI лаган ччан бивкIунни, буну тIий Ислам кунмасса лакрал ххаллилсса жагьилтал махъа нанисса мюрш жагьилтуран эбратранну къуццу тIутIисса – спортравугу, диндалувугу, цала нитти-буттал ва махъсса цинявппагу инсантурал хIурмат бавривугу.

«Ттуща къашай миннух буруган»

На ва макьала чичав, Исламлул ниттирссищал Аьлиятлущал ихтилат буллай, пахру-ххара бакъа­сса, хьхьичIун урувгсса, цаятува буслан къаххирасса Исламлун хаварвагу бакъанма.
— Исламлун къаччантIиссар цаятува чивчуну. Ттула ссин – мунал ниттингу къаххирар Исламлуяту буслан, пахру буллан, — тIий бур Аьлият.
Амма жул умуд бур Ислам рязи хьунссар редакциялийн учIан, гьарта-гьарзану цаятува, цалва тренертурая ва дандиуккавурттая бусан тIисса.
«Исламлул дандиуккавурттах цукун, ци асардащал буругару?» — тIисса ттул суалданухьхьун Аьлиятлул увкунни:
— Ттуща къашай миннух буруган. Я ссища къашай. Гъан-маччасса арамталлив, шайми батIайссар ЦIусса Хушетрай Исламлул бу­ттал къатрайн, цачIу щябивкIун, буруглан бикIай му гьурттусса бяст-ччаллах. Амма паракьатшиву, шану бакъассар жун, бияву къуртал хьуннин …

«Глейсон мунал най уна «шанаши» унни»
Яла архIал морожни дукангу лавгунни

Исламлул ва ххуллухсса ияврий гьуртту хьунни чIярусса шиннардий Американаву ялапар хъанахъисса жула лакку оьрчI, ишбажаранчи Сурхай Ссунгъуровгу. Сурхайл, лак бикIу, махъсса цайми дагъусттанлувтал бикIу, миннавух цIа дурксса спортсментал тIий, укунмасса инсантал тIий, хьунабакьайссар США-наву, чил билаятрай миннал мурадру щаллу бан цащара шайсса чIарав ацIаву дувайссар. Сурхайл Американаву дагъусттанлувтал гьурттуну хъанахъисса цавагу иш лях гьан къабитайссар, бюхъавай. Му ппурттуву цува Американаву къаивкIнугу, жула лакку оьрчI Исламлул чIарав ацIангу Сурхайл цимирагу азарда километра диртунни гьаваллавухгу, аьрщарайхгу.
— Ттун Ислам кIулну ххюра шинни, дахьа цалчин Американавун увкIсса чIумал на хьунаавкьу­ссия му. Исламлух ялугьлай дуссар хъуни-хъунисса бюхттулшивуртту, ттул пикрилий. Миннуйн ияншивруллив ванаву дур чара бакъа аьркинмур: бищаврил (удар) техника, партер, чурххал кьуват-ккаккияртту. Ххаллилсса ию акъа­сса, Ислам ур лакрал, Дагъусттаннал жагьилтурал цимурцаннуву эбрат ласунсса жагьилгу, дусшиву дуван ва дуруччин кIулсса, хъуниминнал хIурмат буван кIулсса, чумартсса зунтталчу. ТачIав ккавккун акъара Ислам ссибивзун, щищал-унугу лахъну гъалгъа тIий. Исламлул наставникну ур ххаллилсса чув, цимиягу дунияллул чемпион тарбия ув­сса Аьбдулманап НурмахIаммадов. ХIабиб НурмахIаммадовлул ва Исламлул дянив тIурча, дуссар уссурваврал куннасса арарду.
Ттун хъинну захIматну бикIай инсаннаяту цIарду дуллан, амма Исламлуя бусланма буслан хьунссар ххуймур. Ва махъсса Исламлул дандиуккаврийн левххун най на кIира хьхьу-кьини дував (Макка-Жидда-Дубай-Москав-Нью-Йорк), яла – ххюра ссят машиналий Бостоннайн ияннингу. ХIабибгу увкIунни хасну ва бойрайн, навама ва ххуллух му къаучIансса ххай уссияв, цанчирча мунал цаламур ияву хьуну хъунма хIал къалавгун буну тIий. Шиккува кIицI лаган, ва ххуллух Исламлуйн данди увксса Глейсон Тибаущал ХIабиблул ияву хьуссия 2012 шинал, ттул пикрилий, му дия мунал карьералуву яла захIматмур ияву ва ххувшаву. Микку нагу уссияв. Утти му опыт бусса, гужсса боецнащал увккунни Исламгу, ияврил дайдихьулийра ккаккан дунни цалла цукун усттарсса бищаврил техника дуссарив ва цалчинмур раундрайва Глейсон «шанаши» унни. Муния махърив Ислам ва Глейсон архIал морожни канай щябивкIун бия.
Залдануву, на акъасса, 50-ннийн бивсса жулва дагъусттанлувтал (Американаву ялапар хъанахъи­сса Дагъусттаннаясса ттаттахъулгума) бия Исламлухлу дакI цIий, мукуна ацIаксса туркгума ия. Хасну ва бияврийн Американавун левххун бувкIсса инсанталгу бия, масалдаран, Исламлул оьрчIниявасса дус Муслим, Москавлиясса бизнесмен Марк, — буслай ур Сурхай.

«ЦIуртти» – «цIурттая»

Ислам МахIачевлул Американавусса дандиуккаврих буруглай, ванал гъан-маччами, дустал бакъасса, бия хъинну чIявусса инсантал – миннавух жула, лак­рал, цIа дурксса балайчитал ва къавтIалтгу.

Марианна, ДР-лул лайкь хьу­сса артистка:
— Ислам МахIачевлул ва махъсса дандиуккаврих хъинну дакI цIий буруглай бивкIру. Ислам кунмасса жагьилтал хъанахъи­ссар ттул оьрчIанссагу, махъсса цайми-цайминнанссагу эбратну. Январьданул 28-нний на хьуссияв МахIачкъалаллал чIава жагьилтурал дянивсса киокусинкайрал первенство тIитIлатIисса шадлугърай, музыкалул хъамаличу хIисаврай. Ттущала архIал арс Асадуллагьгу увцуссия, мунангу ккакканшиврул ва журалул бяст-ччаллу цукун шай­ссарив (цанчирча ттул арснал шанна шинни карателухун агьну). Арсналгу, ттулгу ххаришиврул дазу-зума дакъая, микку жула чемпион Ислам МахIачев ххал шайхту. Мунайн оьвкуну бия миккун хIурмат бусса хъамаличу хIисаврай. Ххуй­сса ихтилат бунни мунал микку, спортсментуран тIайлабацIу чIа тIий, оьр­мулуву ва спортраву бучIи лякъин­сса маслихIатру буллай. Ххаллилсса тарбиягу дусса, мазралгу пасихIсса оьрчI ур Ислам. Му кунмасса лакрал жагьилтураяр жулва пахру.
ЧIа тIий бура Исламлун муданмасса тIайлабацIуртту, ринграй бакъа, щалвавагу оьрмулувугу.

Рашид Багъатаев, ДР-лул лайкь хьусса артист:
— Лакрал язисса арсная Ислам МахIачевлуя хъунмасса гъирарай дуванна ца-кIира калима. Ччяния шинайва уруглай, хIисав ласлай ура мунал карьералул. Мудангу махIаттал увара мунал цумушиврул, пахру-ххара бакъашиврул.
Барчаллагь жулва лакку кказитран, Ислам МахIачев кунасса лайкьсса жагьилная чичлай тIий.
Махъсса ва талатаврия тIийрив, мунилгу махIаттал увунна. Муних буруган, ресторандалуву столгу заказ бувну, ттула уссурвавращал ва ттула дус, «Ватан» ансамбльданул художествалул каялувчи, АхIмад Марсеновичлущал къур бувсса ссуп­ралух вари чинну щябикIаннин, ххувшаву ларсун, ххари бувунну Исламлул.
ЧIа тIий ура Исламлун цIакьсса цIуллушиву ва цIакьсса иман.

АхIмад ХIаммадаев, къав­тIаврил «Ватан» ансамбльданул художествалул каялувчи:
— Жу Исламлущал ччянива кIулссару, мунал цIа машгьур хьуннинна – архIал футболданий буклан занай бикIайссияв. Ххарира хъинну Исламлул цIа цалнияр цал машгьур хъанахъаврия. Рашид Багатаевлущал архIал буруглай бу­ссияв мунал ва ххуллухмур талатаврих. Ччясса ва ххаллилсса ххувшаву ларсунни …

Жула редакциялулгу, щалвагу миллатрал цIаниятугу барча тIий Исламлухь ирглийсса ххувшаву, чIа тIий буру оьрмулуву ва спортраву цIу-цIусса бюхттулшивуртту.