ЦIуллу-сагъшиву дуруччаврил идарарттай жагьилсса пишакартал хьунабавкьукун, цIуппурттуву инсантал миннай вихшала дишин нигьа буслан бикIай. Махъсса ппурттуву тIурча, къачансса хьунабакьлай бур цайнува цивппа хьхьичIунсса ВУЗ-ирдавунгу бувххун, куртIсса кIулшивурттугу ларсун, ххаллилсса пишакартал хьусса жагьилтал. ХIакьинусса кьини мукунминнах мякьну бур щала Аьрасатнал билаят ва ми, лув личIан къабивтун, хьхьичIунсса медициналул клиникарттайн, жучIава бакъассагу, дазул кьатIувгу, кьамул буллай бур.
Вай гьантрай на хьунабавкьура Дагъусттаннал Яруннал микрохирургиялул центрданул катарактальный хирургиялул каялувчину зузисса жагьилсса хIакин, Хъусращиял шяравасса Шихунов Давуд Ширванинал арснащал. Шиккува кIицI лаган, Даудлул ппу чIярусса шиннардий Ккуллал райондалийсса азарханалий бусравну зий ивкIсса, лавайсса даражалул хIакинъя.
Имара Саидова
2011 шинал Давудлул хьхьичIунсса хIасиллащал къуртал бувну бур Дагъусттаннал медициналул академия. Итххявхсса, хьхьичIун ливчусса студент хIисаврай, Давуд интернатуралуву дуклан увцуну ур Каспийскалийсса Яруннал микрохирургиялул центрданийн. Шикку зузисса чIирисса чIумул мутталий ванал ккаккан бувну бур цалва хIакиннал пиша нахIакь дан язи бувгьуну бакъашиву. Центрданул хъуниминналгу жагьилсса хIакиннай дакI даркьуну, ацIан увну ур тиккува. Ванал Санкт-Петербурграй бувккуну бур яруннал микрохирургиялул хIакиннал даража лавай баврил курсругу. Гьашину январь зуруй Давуд ивтун ур Витреоретинальный ва катаралктальный хирургиялул отделениялул хъунаману. Дагъусттаннай яруннал мушакъатшиву дусса чIявусса инсантал бушиврийн бувну, Давуд буслай ур Центрданийн бувкIсса къашайшалт, цIу-цIусса технологияртту ишла дуллай операцияртту буллай, уква хъин буллай бушиву.
— Жул Центрданий ультразвукрал ва лазерданул энергиялул кумаграйну яруннан зарал къабиянсса цIусса технологиярттайну хъин дуллай буссар яруннал нервардал, сетчаткалул, архну ва гъанну чIалачIаврил, астигматизмалул азарду ва м.ц. Центрданий зий буссар ларайсса профессионализмалул хIакинтал. Мукунма цIанакул жучIа, лазерданух операцияртту бувну, хъин дуллай буссар катаракта, глаукома, тIайла буллай буссар яру, — буслай ур Давуд.
Пластикалул хирургиялул ва цIусса технологиярттал отделение тIитIаврийнугу гьарта-гьарза хьуну дур шикку медициналул хIаллихшиннарду.
Центрданул хIакинтурал цIа дургьуну, шиккун букIлай бур, Дагъусттанная бакъассагу, Ставрополлая, Чачаннава, Ингушнава, Къабардин-Балкьарнава, Азирбижаннава ва Аьрасатнал цаймигу регионная.
— ЧIявусса инсантал бикIай яруннай операцияртту бан анавар къабуклакисса, хъиннува чаннал мушакъат хьунссару тIий, хIучI тIутIисса. Мукунсса инсантуран ва цинявппагу яруннал мушакъатшиву думиннан кIулну бикIаншиврул, цIана Центрданий яла хьхьичIунми офтальмалогиярттай куннасса LASIK тIисса эксимерлазерьданул методикалий къашайшалт хъин буллай буссар, — тIий ур Давуд.
Ва методикалийн бувну хъинну захIматсса яруннал тагьар дусса инсантурангума чани зана битлай бур. Центрданийсса ца яла хьхьичIунми американал фирмардал оборудованиярттал кумаграйну сайки циняв журардал катарактарду хъин дуллай бур. Республикалул архсса щархъавусса агьалинан медициналул кумаг баву мурадрай, шичча тIайла буклай бур офтальмологтурал бригадартту.
Микрохирургиялул центрданий дур агьалинан укра дуллалисса тамансса хIаллихшиннардугу.
