ЦIусса шин дайдихьулул гьантрай увсса кьини кIицI ларгунни жула машгьур­сса шаэр ва педагог Даниял Магьдиевлул.

А. Аьбдуллаева
ЧIярусса шиннардий Ккур­ккуллал дянивмур даражалул школалий учительну ва директорну зий, Данияллул багьа бищун къашайсса даву дурссар оьрчIру Ватан ххирану тарбия бан. Ккурккуллал школалий патриотизмалул масъалалух мудангу ххишаласса къула­гъас дикIайссия. ХIакьину Даниял МахIаммадаьлиевичлул каялувшиву дуллалисса цIа дурк­сса Аьра­ли музейрал гьанугу ванал цалар бивзсса 30-хъайсса шиннардил хьхьичI. Махъсса шиннардий Ххувшаврил байрандалул кьини щалагу жула билаятрай аьдатравун дагьунни БивкIу бакъасса полкрал акция. Ва даву хьхьичIра-хьхьичI Ккурккуллал школалийя хьу­сса. 1985-ку шинал, Хъунма­сса Буттал кIанттул цIанийсса дяъвилий Ххувшаву ларсун 40 шин хъанахъисса кьини, Ккурккуллал шяраву хьуссия «БивкIу бакъасса вирттал» тIисса акция. Дяъвилий жанну дуллуминнал суратирттащал дуклаки оьрчIру шяраваллил майданнийх лагма бувкссия. Мунияр шихуннай ва даву аьдатравун дагьну дуссар школалий.
ХIакьинусса кьини школалул музейраву дур чувчIав дакъасса экспонатру: Бусравсса ттугъ, цийгу дяъвилия зана къавхьусса 57 ккуркличунал цIа чирчусса, Вирттаврал цIа ларсъсса 13-гу шагьрулиясса аьрщарал кIама, Освенцим концлагерьданул газрал камералувасса бетондалул парчри, бивкIулул камералувасса ятIул калпуш. Хъунмасса Буттал кIанттул цIанийсса дяъвилий Ххувшаву ларсун 70 шин шаврин хасну Данияллул заказ дурссар Ростоврай дяъвилия зана къавхьусса 57-гу ккурк­личунал цIарду чирчусса медаллу ва Ххувшаврил кьини медаллу лахъа-хъунну дуллу­ссар миннал оьрчIахьхьун, гъан-маччанахьхьун.
Данияллул дуллалисса даврил агьамшиву бувчIлай, мудангу ванал чIарав буссар шяраваллил жяматгу. Хъунна­сса агьамшиву дусса ишну хьу­ссар дяъвилия зана къавхьу­сса ХIажидавудлул арснал Сулайманнул цаппара шиннардил хьхьичI шяраваллил майданнив дяъвилий жанну дуллуминнал ва талай бивкIминнал аьпа абад бан лухIисса мармарчарил гьайкал дацIан даву, Аьвдуссалан Магьдиевлул дяъвилий талай бивкIсса 129-гу ккуркличуная чивчусса лу буккан баву, Ханича Аьлиевал мукунмасса шеърирдал жуж итабакьаву. Вай лу­ттирдугу буссар школалул музейраву бивхьуну.
Гьарица шинах шяраву дуллалисса Ххувшаврил байрандалул шадлугъ лахъа-хъун дан ансамбльданущал бучIайссар Каспийскалийсса инженерный колледжрал преподаватель Анжелла Абачараева. Вай давурттавух Ккурккуллал школалущал хIала-гьурттуну буссар МахIачкъалаллал 11-мур школагу.
Данияллул школалул цIаний дурсса давуртту чIяруссар, ми цинявннуя къабусланна. Увсса кьини дакъассагу, ца цамур затгу барча бан багьлай бур: Лакрал райондалул чулухасса вакил хIисаврай, Даниял Магьдиев уттигъанну увчIунни ДР-лул БакIчиначIасса Хъунисриннал советравун. Барчагу уллай, чIа тIий бура ттула шяравучунан цIуллушиву, гьарца давриву тIайлабацIу. Хъин-хъинсса давуртту дуллансса гъирагу, гьавасгу виву тачIав къалещаннав, Даниял МахIаммадаьлиевич!