Яла хъунаманан хьуну дур 80 шин

[dropcap]Ш[/dropcap]иная шинайн гьарза хъанай бур МахIач­къалаллал халкь. Щархъава шагьрулийн бизлазими сававну бакъача, хъунмур савав шиная шинайн шагьрулий оьрчIру гьарзану буллалаву дур. Махъсса шиннардих бурувгун яла чIявусса оьрчIру бувну бур 2016 шинал – 11772 . Ларгсса 2017 шинал ва сияхI цахъи чIири хьуну дур. МахIачкъалаллал ЗАГС-рал пишакар СултIанат Мусаевал бусаврийну, ларгмур шинал вайнначIату 11086 оьрчI баврил чагъар лавсун бур. Миннувух оьрчIрунияр гьарзану бивкIун бур душру (5618 душ ва 5461 оьрчI), 240 кIинничалт бувну бур.

З. АьбдурахIманова
ЦIусса шин дайдирхьуния шинмай МахIачкъалаллал ЗАГС-рал 500 оьрчI баврил чагъар буллуну бур нитти-буттахьхьун.
ХьхьичIми шиннардий кунма оьрчIру бувсса кулпатру бур 22-30 шиннардивусса хъами-арантал.
Бувсса душваран дизайсса ца яла машгьурмур цIану ттигу София тIимур цIа дусса дур. Мукунна Ххадижат ва Аьйшагу. ОьрчIан дизайсса ца яла машгьурмур цIа МухIаммад тIисса цIа дур, мукунна гьарзану дур Рамазан ва Халид тIими цIардугу.
Хьунабакьайсса бур нажагь дакъа къадизайсса цIарду дирз­сса ишругу. Миннувухсса ца дур МахIачкъалалив ялапар хъанахъисса авгъаннал кулпатраву дирзсса Путин тIисса цIагу. ОьрчIан дирзсса машгьур дакъами цIардавух дур Каратли ва Улувье тIими цIардугу. Душваран дирзминнуву – Шанче, Малина ва Айслю тIисса цIарду.
Ларгсса шинал, МахIач­къалаллал ЗАГС-рал ташурдал отделданул хъунмур пишакар Жанна Халимбековал бусаврийну, шагьрулий 3500 кулпат сакин хьуну бур. Миннуву чIявуми цалчинсса ташурду бувсса бур. Шиная шинайн гьарза хъанай бусса бур чил хIукуматирттаясса оьрчIан хьу­сса, душ бувцусса кулпатругу. ЗАГС-рал хIасиллайн бувну, 2017 шинал чил хIукуматирттаясса халкьуннащалсса 778 ташу хьуну бур. Ва ххуллух чIявуми буцай оьрчIру ва буцай душру бивкIун бур Азирбижаннаватусса, Украиннавасса ва Таджикнавасса. Бур ташурду Латвиянавасса ва Кувейтнавасса жагьилтуращал бувссагу. Вай ташурдавугу хъунмурчIин жула душру цайми хIукуматирттаясса оьрчIан щар хьун рязий хьусса бур. Жагьилтураву чил билаятирттая­сса душру бувцуми ишру хъинну чансса бур.
Цалчин ташурду бувминнал шиннугу ххи хьуну дур. Щар хьусса душру бур 24-27 шиннардил оьрмулувусса. Цалчин кулпат бувсса жагьилтурангу дянивну 30-35 шинну дур. Мукунма ларгсса шинал балугъравун къабувхсса 20 душнил ташу бувну бур. Яла жагьилмур жалиндалун 16 шин диркIун дур. Наврузбагтураву яла жагьилма ивкIун ур 18 шин хьусса жагьил. Ларгсса шинал щарсса дурцусса яла оьрмулул хъунама «наврузбагнан» диркIун дур 80-нниха лирчусса шинну. 2017 шинал МахIачкъалалив яла хъатIив гьарзасса барзру август ва сентябрь бивкIун бур. Яла хъатIив чансса, цайнмагу Зумаритавал барз тIайла бавцIусса барзну хьуну бур июнь. Ва зуруй бувагу 2 ташу бувну бур.
2017 шинал, мукунма хьхьичI­ми шиннардий бувсса ташурдавасса 1112 кулпат личIи хьуну бур. Вайгу хьхьичI бувсса кулпатирттал 30 % хъанахъиссар. Вагу, гьар шинах лагь-лахъ къархьуну, шиная шинайн ца кьаралданий нанисса тагьар дусса дур.