КIувурдал шяравасса Сулайманнул Султан-ПатIи­матлул арс Юсуп ахиратрал хьуну январьданул 13-нний бартлаг­лай дур 25 шин.

[dropcap]О[/dropcap]ьрмулул 39 шинаву, цIуцIи шанийгу лахъи къалавгун, хIа­кинтуращагу кумаг бан къавхьуну,шанма мюрщисса оьрчIгу, чIиру кунма, ниттил лагма лечлай кьабивтун, лавгунни дунияллия. Кьуния ххюра шин чIирисса чIун дакъар, уссур-ссу хIакьинусса кьинигу бур ва иш, лахьхьу-хIакьину хьу­сса кунма, лялиян бан къахъанай. Жула учай, аьрщи лаллай, чIун най, дакIнил къюву хьхьара шайссар куну. Къашайсса дур, я хьуншиву къакIулли. Ва хъамаитайма акъая. Аьчухсса дакIнил заллу, яхI-къириятрал виувцIусса, жяматрачIа бусраврайсса хIакьсса зунттал чув, дугърисса тIуллал заллу. Ххишала дакъа ччаву дусса ия уссу-ссурваврал чулухуннай. Нюжмардий цал-кIил тIиссакссагу, уххайва гьарцанначIан. Ци иш бур, цукун буру, аьркинсса ци дур куну цIуххайва. Иш багьсса кIанай, ливчунийн чару куна, цалчин ххуттай икIайва. Ва зий уссия мелиорациялул министерствалул автобусрай. Жяматран, гьалмахтуран, иш багьну, машина аьркинсса чIумал, чIун дур-дакъар къаувкуну, масъала щаллу байва. Циксса къаувкухьунссар ванахь барчаллагьру. Бю­хъайссарив ванияр хъуннасса бахшиш дикIан.
Буллалисса ихтилатгу пиш-пиш тIийнмасса бия. Щарнил арамтуннал, гьалмахтурал ванал хIурматран, ва лахъа-хъун уллай, ванайн Штирлец учайва. Ци банссар, кьадардания хха­ссал хьун къашай. Гьав нурданул чанна даннав.
Нязаннивсса арснал бив­кIулул дард духIан къархьуну, ванал хъирив ахиратрал хьуна ппу ва буттарссу. Вайннал цIа ва аьпа узданну ябуллай бур уссур­вал, ссурвал.
Юсуплул кулпатрал Асватлул, цуксса захIматнугу, лялиян дан къашайсса кьурчIишивугу кьюлтI увкуну, ккаккан дунни хIакьсса зунттал хъамитайпалул яхI-къирият. Ппу акъашиву кIул хьун къабивтун, ссахчIав мюхтажнугу къабивтун, хъуни бувунни оьрчIру.
Ца аьлимнал увкуну бур: «Ссавур цурда кьурчIи-тIинсса зат духьурчагу, мунил ахъул­сса нацIуссар»,- куну. Ва калима мяйжаннугу тIайласса дур. Асватлул ссавурданул нацIусса ахъул­сса – уссурссуннан пахрулун­сса арс ва душру, душнил арс, ниттил иттавгу ялугьлай, икрамрай бавцIусса. Ниттил цала чулухунмай бувсса захIматрахсса бурж лахъан шайвав тIий бур. Вайннал хиял дузрайн букканнав. Амин.
Асват ласнал агьулданул гьарца ишираву чялишну гьур­тту шай, цуппагу вайнначIа хIурматрай ва бусраврай бур. Укун личIаннав абадлий.
Абадлий зу дакIнийсса
уссурвал, ссурвал