Ца шинал мутталий – ца миллион!

Декабрь зурул 12-нний МахIачкъалаллал АхIмадхан Султаннул цIанийсса аэропортрай кьамул бувсса пассажиртурал сияхI лархъунни миллиондалийн. Аэропортрал тарихраву цалчинни шинал мутталий миллион пассажиртурал кьамул бувсса. Ва иширан хас дурсса мероприятиялий гьуртту хьунни ДР-лул Президент Владимир Васильев, ДР-лул ХIукуматрал ва Администрациялул бакIчинал каялувчи Владимир Иванов, ХIукуматрал вице-премьер Шамил Исяев ва «Россия» авиакомпаниялул директорнал кумагчи Сергей Стариков.


Имара Саидова
Миллиондалийн бивсса па­ссажир хьунни «Россия» авиакомпаниялул рейсрай левххун най бивкIсса Асма Шамилова.
Владимир Васильевлул барча дунни аэропортрал коллективрал юбилей.
— Аэропорт хьхьичIунмай хъанахъаврийну жущава бюхълай бур ччимур билаятрайн биян, дустуращал, гъан-маччанащал хьунабакьин, медициналул кумаграл хъирив гьан. Агьалинаща бюхълай бур, уттизаманнул аэропортрай цIу-цIусса цIакьсса самолетирттай лехлай, цала мурадру бартбигьлан. Шиккува кIицI лаган ччай ура, агьалинал мюхчаншиву дуручлай, бацIаву дакъа зузисса аэропорт­рал ххаллилсса пишакартурал буллалисса захIмат. Хъунмасса барчаллагь зузалтран, чIа тIий ура зун давриву тIайлабацIу ва хьхьичIуннайшивуртту, — увкунни Владимир Васильевлул.
МахIачкъалаллал аэро­порт­­рал директор Арсен Пирма­хIаммадовлул цала ихтилатраву кIицI лавгунни аэропортрал давриву пассажиртал чIяву шаву – му агьамсса иш хъанахъишиву.
Арсен ПирмахIаммадовлул дурккунни АьФ-лул Федерал Мажлисрал Федерациялул Советрал член Сулайман Керимовлул аэропортрал коллектив барча буллалисса адрес.
Аэропортрал зузалт ва юбилейрал пассажир барча уллали­сса ихтилат бунни Сергей Стариковлул. Мунал Асма Шамилован дуллунни аэропортрал VIP-зал шинайсса ишла буллансса сертификат ва сувенирду.
Владимир Васильевлулгу юбилейрал пассажирнан пиш-каш дунни цIа кусса ссят. «Россия» авиакомпаниялул чулуха Асма Шамилован дуллунни ва компаниялул самолетирттай лехлансса сертификат ва цаймигу бахшишру. Дагъусттаннал БакIчинангу пишкаш дунни «Россия» компаниялул самолет­рал модель.
Шиккува кIицI лаган, Владимир Васильев Дагъусттаннал Президентну ацIан нанинийгу «Россия» авиакомпаниялул самолетрайри увкIсса.
МахIачкъалаллал аэропорт Дагъусттаннай бувагу бусса ца авиапредприятие хъанай бур. ХIакьинусса кьини аэропортрая Аьрасатнал шагьрурдайн ссят­рал мутталий лехлай ур 200 пассажир, дазул кьатIувсса билаятирттайнсса рейсирдайгу ссят­рал мутталий 60 пассажир лехлай ур.
2016 шинал, февраль зуруя байбивхьуну, аэропортрай буллай байбивхьуну бур 8000 квадрат метра дусса, 190 пассажир ссятрал мутталий кьамул уван бюхъайсса цIусса терминал.
2017 шинал май зурул 3-нний МахIачкъалаллал аэропортрахьхьун ихтияр дуллунни хъунисса салонну бусса Boeing -767-200, Boeing767-200ER, Boeing- 767-300, Boeing-767-300ER ва Airbus A-330-200 модификациярттал самолетру кьамул дуллансса.
Гьарица кьини МахIач­къа­лаллал аэропортрая Москавлийн лехлай дуссар ацIрахъул самолетру, мукунна шичча самолетру лехлай дуссар Санкт-Петербурграйн, Сургутрайн, Ростоврайн, Сочилийн ва Минводылийн, Къазахъисттаннайн, Туркнавун ва цаймигу билаятирттайн.