Художникнал дирхьу­сса суратирттая бусласаву нахIакь­дансса давуну дизай ттунна. Шаэрнал шеърирдая кунма. Ххуйсса шеърирдая неъмат ласунтIисса, ми ккаларчанни. Художникнал даврин кьимат бищунтIиссагу, мунал дирхьусса суратирттай тамаша буварчанни.Машгьурсса художник Альберт Хаджаевлул дирхьусса суратирттайн я бияйхту, зумату итххя­ххай хIайран хьусса чIумал учайсса махъру: «авуршиву», «ххуйшиву», «яргшиву»! Булайхха Заннал инсаннан гьунар – ссихIир бувсса кунма, пилча щурущи бувну, караматсса суратру загьир дувайсса. Амма художникнал даву, му цуксса гьунар бусса ухьурчагу, гьунарданучIа захIматгу, захIмат буллан гъира-гьавасгу аьркинсса давур.

 

 

ПатIимат Рамазанова
Дур Альберт Хаджаевлул гьу­нардануцIун захIмат ххирашивугу, цалла даву ххирасса ухьукун, зунсса гъира ва гьавасгу. Хасиятрал ми лишанну цачIу цIакь хьувкун, хIасул хъанай дур ххаллилсса творчество, я щунал я бацIайсса караматсса суратру.
Декабрь зурул 24 -нний Альберт Хаджаевлун хъанахъиссар 80 шин. ГьунчIукьатIрал шяраватусса цIанихсса тухумрал арс увссар Буйнакскалий. Къуртал бувссар тиккува финансирттал техникум. Аьралий бурж биттур буллан Германнавун, Дрезден шагьрулийн, тIайлаацIаву мунансса тIайлабацIу хьуссар, Дрезденнал галереялувусса суратирттай тамаша бувансса сант дагьну тIий. Аьрали бурж биттур бувну махъгу, художникнал касму ххуйну лахьхьин, тихва авцIуссар. 1962 шинал Дагъусттаннайсса хьхьичIва-хьхьичIсса хъамитайпа-леххул Бавер Жяъпаровал оьвкуну, Да­гъусттаннайн зана хьуссар ва «Темп» тIисса (уттисса «Дружба») кинотеатрданул художник-рекламистну зий ивкIссар. 1972 шинал къуртал бувссар Ттуплисуллал Художествалул академия, живописьрал факультет. Магьиршиву лахьлай ивкIссар Гуржиял халкьуннал художник, паччахIлугърал премиялул лауреат, цIа ларгсса профессор Санадзел мастерскойлуву. Академия къуртал бувну махъ, ДАССР-данул Культуралул министерствалул тIалав увну, зий ивкIссар Жамаллул цIанийсса Дагъусттаннал худучилищалул преподавательну.
Альберт Хаджаев Аьрасатнал ва Дагъусттаннал лайкь хьу­сса художникри, Юнесколул изобразительный искусствардал дунияллул халкьуннал ассоциациялул ( АИАП Юнеско) членни. Ванал цIа дуссар Германнаву итабавкьусса «Дунияллул художниктал» тIисса каталог­рай. Ванал суратру дуссар Аьрасатнал ва Дагъусттаннал музейрдаву. Ванал творчествалуву хъунма­сса кIану бугьлай бур буттал кIанттул тIабиаьтрал, Хъун дяъвилул темардал. Хаджаевлул цIа хъиннура машгьур дурну дур портретирттал ва натюрмортирттал. «Имам Шамил» ва «Имам Шамиллул арснал душ Написат» тIисса портретру лайкь хьуну дур Дунияллул халкьуннал комитетрал цIаниятусса премиялун ва бахшишран. «Бархъарадуш» тIисса суратран Москавливсса выставкалий лахъсса кьимат бивщуну бур Аьра­сатнал художествалул академиялул президент Зураб Церетелил. Вара портрет ккаккиялун дирхьуну дур Франциянаву, Парижлив­сса ЮНЕСКО-лул штаб квартиралий. «Натюрморт» суратгу Турциянавусса, Ираннавусса выставкардай хьхьичIунсса кьиматирттан лайкь хьуну дур. Ванал натюрмортирттал суратирттаву аьлттану чIалай бур буттал улклул агьалинал ишла дуллай бивкIсса матахIрал ва тIахIнилул хIурмат, ми хIурматрай ядуллан аьркиншиврий мукIру буллалисса оьвчаву. Ппухълуннал аманат ва дуаь.

Лавгзаманнул тарихрал хIурмат. РувхIанийсса ххазинарду ябуван­сса хъит. 2015 шинал дирхьусса «Аль-ХIамду» тIисса натюрмортрал тема, мурад бур жагьилсса никирайн рувхIанийсса ххуйшивурттал кьадру кIулну къуццу тIун оьвтIисса. Ва суратран бюхттулсса кьимат бивщуну бур ПаччахIлугърал Третьяковская галереялул искусствоведтуралгу. Машгьурну ур Хаджаев художник- график хIисаврайгу. Дагъусттаннал, Аьрасатнал ва кьатIаллил билаятирттал автортурал кIиттуршунниха ливчусса лу­ттирдал художник-график ур ва. Миннувасса цаппараннул цIарду кIицI лаган: Расул ХIамзатовлул «Ттул Дагъусттан», Абакар Мудуновлул «Оьттуву лархъсса цIу», мукунма лакрал литературалул классиктурал – Юсуп Хаппалаевлул, МахIаммад-Загьид Аминовлул, Ккурккуллал Щазал луттирду. Ванан куртIну кIулли Дагъус­ттаннал тарих ва багьу-бизу, кIулли дунияллул литература ва магьирлугъ. ХьхьичIун урувгсса, пахру-ххара бакъасса Альберт Хаджаевлул узданшиву исватну чIалай дур мунал цалла суратру чIярусса инсантуран бахшиш дурну душавривугу. Ва ур буттал шяраваллил патриот, оьнийгу, хъиннийгу жяматрал иширттачIа ацIайсса. ГьунчIукьатIув, аьрая зана къавхьуминнал аьпалун дацIан дурсса мемориалданул авторгу ур ва. Цувагу фронтовикнал арс ухьувкун, дяъвилул тема ванал дакIнивун мудангу бюххансса асарду бутай­сса тема дур. Альберт Хаджаев ГьунчIукьатIрал шяраваллил герб­рал авторгу ур, ва герб гьануну ларсун, дурну дур ГьунчIукьатIрал ккурандалул члентурал хъазамрай лачIайсса лишаннугу. Ванал дурну дур ГьунчIукьатIрал шяравун нани ххуллий дацIан дувантIисса стелалул дизайн-проектгу. ГьунчIукьатIрал шяраваллил суратруми ккаллину дур багьа бакъаминнун. Амин Аьбдуллаев буслай ур: «Тай экономика лащинсса тагьарданийн дагьсса шиннардий, ГьунчIукьатIувсса аьрая зана къавхьуминнансса мемориал къуртал дуван къахъанай ливчIсса чIумал, чIарав авцIуна Альберт», — тIий.
Художник тачIавгу хъус-кьи­нилийн иман дирхьуминнавух къаивкIун ур. Ванал хъусгу, ххазинагу караматсса суратирттал дуниял дур. ВаначIа дурккучунал, аькьлу буманал, кIулшивуртту куртIманал, адаврай къуццу тIутIиманал хIурмат бур. Укунми хIакьину нажагьсса бур. Гьунар бусса ушивруцIун, ччима мяш хьунну марцIну, цинияргу инсаншиву хьхьичIунну оьрму бувтсса Альберт Хаджаевлул оьрмулул ххуллу жунма цинявннан ккаккиялунсса бур.
Январь зуруй Альберт Хаджаевлул суратирттал выставка дикIантIий дур. Щаллагу дунияллийх ппив хьусса ванал циняр суратру, гьай-гьай, выставкалийн датIан къахьунтIиссар. Амма ванал дирхьусса суратирттаву дакъар царагу дюкъархъуну хьусса, ва мудангу суратирттаха дуниял хъамариртун зун икIайсса уну тIий. Гьарцагу суратраву художникнал мусил дакIнил чани буну тIий.