ДТП-тту сававну чIявусса инсантал литIлай бур Дагъусттаннай. Опыт бакъасса шупIиртал, бахьттагьалт, велосипедистал, аьрххи-ххуллийн бувксса инсантал оьрмурдацIа хъанай бур ягу лихха-личча хъанай бур, ххуллул низам къадуручлай тIий.
Ххуллурдайсса бала-апатIру хъанай бур шупIиртал хIарчIун рульданух щябикIлай ягу анаварсса скорострай най тIий, бахьттагьалт ккаккан къабувсса кIанттурдай ххуллу лахълай тIий.
[dropcap]Ш[/dropcap]инал лажиндарай МахIачкъалалив сияхIрайн ларсун дур 410 ДТП. Миннуву 35 инсан ивкIуну ур, 571 инсаннайн щавурду дирну дур. Ларгсса шинах бурувгун, ДТП-тту 28%-рал ххишала хьуну дур. Ларгсса шинал вара чIумуву 295 ДТП хьуну диркIун дур. Хъунмасса буруккин бутлай бур ДТП-ву чIявусса мюрщисса оьрчIан апатIру хъанахъаврил. Хъуниминная эбрат ласлай, мюрщисса оьрчIругу бур ккаккан къабувсса кIанттурдай ххуллу лахълай.
Шинал лажиндарай МахIачкъалалив мюрщисса оьрчIру хIаласса 74 ДТП сияхIрайн ларсун дур. Миннуву 4 оьрчI бивкIуну бур, 75 лихха-личча хьуну бур. (Ларгсса шинал оьрчIру хIаласса 40 ДТП хьуну дур).
Яла чIявуну хьунабакьлай бур бахьттагьалтрайн машина щусса ишру.
Октябрь зурул 7-нний, ссят 08.45 м. хьусса чIумал, Энгельслул цIанийсса кIичIираву «ВАЗ-21099» машиналул шупIирнал щун бувну бур МахIачкъалаллал 30-мур лицейрал 8 шинавусса дуклаки душнийн. Школалийн нанисса душ ккаккан къабувсса кIанай ххуллу лахълай бивкIун бур. Ва захIматсса тагьарданий азарханалийн биян бувну бур.
КIулшилийн къабувкIна къуртал хьуну бур.
Бахьттагьалтран апатIру хъанай бур чIявумур чIумал ми цивппа сававну. Бахьттагьалт ххуллу лахълай бур ккаккан къабувсса кIанттурдай, светофорданул къадагъа дуллалисса чани лавхъун бунува, буклай бур ххуллийн бавцIусса машинарттал махъату. Цинярдагу ДТП-ттал хIакъи-хIисав дуллан бивкIукун, оьрчIан апатIру хъанай бур хъунмурчIин школалий каникуллу дусса, оьрчIру хъуниминнал къулагъасрала бувксса чIумал.
Ссуттил каникуллал чIумал, ноябрь зурул 1-нний, ссят 21.00 хьусса чIумал, Танкаевлул цIанийсса кIичIираву, №59 къатрал чIарав, «ВАЗ-217030» машиналул шупIирнал бахьттагьалт лахъайсса кIанттурдай машина щун бувну бур 12 шинавусса оьрчIайн. Ва, цIунцIияртту хьуну, азарханалийн иян увну ур.
ШупIиртал баччибакъашиву дуллай бур бахьттагьалтрал ххуллу лахъайсса кIанттурдай.
Ххуллурдай апатIру къахьуншиврул, шупIиртал бикIу, бахьттагьалт бикIу, личIлулну бикIан аьркинссар.
Хъуниминнал ххуллу лахъаврил, ххуллул низам дуруччаврил эбрат ккаккан дан аьркинссар мюрщиминнан. Мунийну жува жула оьрчIру бала-апатIрая мюхчан буллалиссар. Гьарнан ххал шайсса сурат дур нину-ппу, мюрщисса оьрчIругу бувцуну, ккаккан къабувсса кIанттурдай ххуллу лахълахъисса.
Так ГИБДД-лул зузалтрал хIарачатрайну ххуллурдайсса тагьар къулай дан къашайссар. ДТП-ттаву оьрчIан апатIру хъанахъиссар нитти-буттал баччибакъашиву дурну, учительтурал ва тарбиячитурал лахьхьин къабувну, шупIиртал ххуллул низамрава бувккун, ххуллул чIарав тIуркIу тIутIисса оьрчIай чIарах наниминнал дюъ къадирхьуну.
Ххуллийн бувксса шупIиртуралгу, бахьттагьалтралгу кувннал хIурмат кувннал бан аьркинссар ххуллурдай апатIру къахьуншиврул.
Лиана Наврузбекова, полициялул хъунмур лейтенант
ХIадур бувссар А. Аьбдуллаевал
