[dropcap]Т[/dropcap]тигъанну оьрмулул 94 шинаву дунияллия лавгунни Хъун дяъвилул гьурттучи цаламинналгу, цайминналгу дянив бусравшиву ххисса инсан Рамазаннул арс Чаллахъал Мюрщи

[dropcap]И[/dropcap]хтилат цIа дурксса композитор Чаллаев Ширванинал хъунама уссу Муршидлуятур (ванайн кутIану Мюрщи учай). Ширвани, цува ва даражалийн иян хьхьичIва-хьхьичI уссу савав хьу­ссар, мунал насихIатралгу, бивхьу­сса захIматралгура на шиккун иян увсса тIун икIай.
Мюрщи увну ур Хъусращиял шяраву Чаллахъал Рамазаннул ва Разиятлул кулпатраву 1923-кусса шинал. ЧIивину унува му ятти-гъаттаралсса буллай, личIи-личIисса ичIаллил давур­тту дуллай, шяраваллил цайми оьрчIру куна хъуна хъанай ивкIун ур. Дуккавриву Мюрщи мудангу хьхьичIунминнавух ивкIун ур. Хъусрахь мукьва классгу къуртал бувну, 1934 шинал ва Гъумуксса ШКМ-райн увххун ур. 1937 шинал тIурча, му дянивмур даражалул школалийн кIура баен бувну бур. Му школа Мюрщил къуртал бувну бур 1940 шинал. Ванаяр ца шинал хьхьичI школа къуртал бувну бивкIун бур: цалчинмур выпускрал оьрчIру КIулушацIатусса Сулайманхъал Ризван (Совет Союзрал Виричу); Хъанариятусса Къандалаев Загьиди; Вираттатусса Шахшахъал Расул, ванащал цащалва къуртал бувминнавух бивкIун бур: Гъумучатусса Хайдакьхъал Садикь, Рашкъухъал Бакьир, Къапихъал ХIажи, цала шяраватусса Ахъай­хъал ХIамзат, ХIусайнхъал Абакар ва чIявусса цаймигу дустал.
Мюрщил дакIния тачIав къабуккайва цала шяравату цал архIал цащала армиялийн лавгсса цала ацIагу дус. Миннавату сагъну ша­ппай зана хьуну бур так Идил Мус­ттапахъал Жамалуттингу, цува Мюрщигу.
Мюрщи армиялийн лавгун ур 1940 шинал. Къуллугъ буллай ивкIун ур Ленинградуллал дяъвилул округрай, тиккува къуртал бувну бур, лейтенантътал хIадур бай­сса, яла сапертал шайсса курсру.
Дяъви байбивхьусса чIумал Сестрорецк тIисса неххал чIарах минарду дихьлай, яла немец ялун бивгьуну нанийни, жула цIакьшивуртту пIякь учин дуллалисса, душманнайн щавщи биян буллалисса гужлансса талатавур­ттавух гьуртту хьуну ур.
1942 шинал дайдихьулий, жува Выборг кьабивтун махъ, душмантал Ленинградрайн бацIаву дакъа, бомбардал лачIун дуллан бивкIун бур. Му чIумал Мюрщил полк Пулковуллал обсерватория буручлай бивкIун бур. «Мукунсса ккаши бияхха му чIумал, — тIий дакIнин бутлан икIайва Мюрщи, — ливтIусса дучри, бурчул мухIулттив шархьун канан багьайва. Миксса чIявусса жула аьрал бухлавгуна тикку, хаснува Ладожрал бярнийхсса микIирайх бивхьусса «Оьр­мулул ххуллий».
Мунияр махъ Мюрщи командованиялул дяъвилул танкардал училищалувун дуклан Саратовуллал областьрайн тIайла увккун ур. Тагу анаварсса программалий къуртал бувну, Свердловскалийсса Уралмаш заводрава фронтрайн танкарду дурцуну увкIун, 1943 шинал май зуруя шинай Великие Луки, Ерцево, Ржевск, Демидово тIисса шагьрурду тархъан буллалисса талатавурттавух гьуртту хьуну ур. Ерцево шагьрулул чIарав хьусса гужсса талатавриву мунал танк душманнал пIякь учин дурну, Мюрщийнгу захIматсса щаву дирну дур. Госпитальданий хъин хьуну махъ, му цала полкрал хъирив лавну, ялагу кIуми танкардал взводрал командирну ивтун ур. Орш шагьрулучIа хьу­сса къизгъинсса талатавриву душманнал чIявусса гужирдаяр ххув хьуну тIий, мунан «ЯтIул ЦIукул» орден дуллуну дур. ХьхьичIра дир­сса щаву оьнийн дурккукун, командованиялул му хъин хьун Литванавун тIайла ув­ккун ур. Тиккува айивхьуну ур анаварсса программалийн бувну, танкардал командиртал хIадур буллалисса курсирай дарсру дихьлан.
Мюрщи талатисса Прибалтикалул фронтрайсса талаталтран дяъви къуртал хьуну бур 1945 шинал апрель зуруй Баргъбуккавал чулухсса Пруссиянаву. Мунияр махъ Мюрщи къуллугъ буллай ивкIун ур Ленинградуллал, Воронежуллал, Туркисттаннал дяъвилул округирттай, яла Германиянавусса жула аьралуннаву.
Командованиялунгу, цала солдатнангу хъуннасса бусравшиву дусса, захIмат ххирасса Мюрщи армиялий 1960 шиналнин ивкIун ур. Мунал дяъвилий дурсса виричувшивурттахлу орден, медаллу ларсъсса кунна, дяъви къуртал хьуну махъсса шиннардийгу, ччарча армиялий уний, ччарчагу армиялия увкIун махъ, цува хъунама инженерну «Дагводстрой» объединениялий зузиссаксса хIаллай лайкь хьуну ур чIярусса бахшиширттан ва барчаллагьирттан.
Мюрщил бунагьирттал аьпа баннав, рухI паракьатний дишиннав.

Зулайхат Тахакьаева