ЧIава спортсментурал гьунарду

Декабрь зурул 3-нний ЦIуминалийсса ЦIуссаккуллал шяравусса оьрчIансса цIуллу-сагъшиву дуруччаврил центрданий хьунни дуклаки оьрчIал дянивсса акробатикалул спортрал соревнованияртту.Ва цIуну тIивтIусса центрданий гьашину акробатикалул бяст-ччаллу кIилчинни хъанахъисса. Ххув хьуминнансса призру хIадур бувну бия Оьмаев Аьлиханнул.


[dropcap]Т[/dropcap]урнирданий гьуртту хьунни 4 шиная 12 шинайн бияннин­сса оьрмулул оьрчIру. Акробатикалул спортрахун оьрчIру машхул буллай бур Чапаевкаллал школалий физкультуралул дарсру дихьлахьисса учитель, ЦIуссалакрал райондалул оьрчIал спортшколалул тренер ХIусайнова Анисатлул.


Бяст-ччаллу къуртал хьуну махъ шадлугърал даражалий­сса мажлисрай Оьмаев Аьлиханнул барча бунни ххув хьу­сса оьрчIру.
ЦIуссалакрал райондалул спортшколалул каялувчитал дакIнихтуну барчаллагьрай бия мудангу цала дуллалисса даврил чIарав ацIайсса Оьмаев Аьли­ханнуйн.

ХIадур бувссар
Имара Саидовал