ОьрчIансса ва чIаважагьилтурансса бахшиш

[dropcap]Ж[/dropcap]улва билаятрай гьарца шинал ноябрьданул 24-нния 30-ннийн бияннин шайссар щалагу Аьрасатнал «Театр – оьрчIан ва чIаважагьилтуран» тIисса цIанилусса акция. Мунил лагрулий жулва билаятрал, республикалул школарттай ва школалийн гьаннинсса кIулшиву дулаврил идарар­ттай дувайссар оьрчIансса личIи-личIисса шадлугъру.


Бадрижамал Аьлиева
[dropcap]М[/dropcap]у нюжмардул лагрулий Да­гъусттаннал паччахIлугърал ссихьрал театрданул ккаккан бунни Вильгельм Гауфлул произведениялийн бувсса «Халиф Аист» тIисса спектакль. Муних буруган бувкIун бия МахIачкъала шагьрулул 9-мур ва 36-мур школарттал дуклаки оьрчIру.
Спектакль ххал буваннин оьрчIру хьунабавкьунни Дагъус­ттаннал Композитортурал союзрал председатель, театрданул музыкалул бутIул хъунама Рамазан Фаталиевлущал. Мунал оьрчIахь бувсунни спектакльлу музыкалул щаллу баврил цуксса хъунмасса кIану бугьлагьиссарив, театрал постановкар­ттан музыкалул дулайшиву цIусса ягу диял къахъанахъисса рангру, мяъна-мурад, хасиятру.
Ссихьрал театрданул директорнал хъиривчу Ольга Аьбдуразакьовал бувсунни оьрчIал оьрмулуву театрданул цуксса агьамсса кIану бугьлагьиссарив, щалагу Аьрасатнаву гьарца шинал дувайсса «Театр – оьрчIан ва чIаважагьилтуран» акциялия, Ссихьрал театрданул даврия ва театрдануву зузисса личIи-личIисса инсантурал пишардая: художниктурал, дизайнертурал, бутафортурал, звукооператортурал ва чIявусса цайминналгу. ОьрчIру гъирарай ва тяхъану бувчIлай бия мунил цахьхьунма буллусса театрданул оьрмулийн багьайсса ссигъри. Хъирив ххал бувсса ламсанал бюхттулсса магьричинал произведениялийн бувсса спектакль хъинну ххуй бивзунни оьрчIан. Режиссер-постановщик – Роман Пугач, художник-постановщик – Анна Каменева. Актертал: Е. Касабова, И. Шаршавин, О. Швецов, С. Резницкий, Р. Аьлиев, Н. Караханова.