Декабрь зурул 26-нний «Илчилул» редакциялийн дух­сса шин тIайла дуккангу, ЦIумур барча дангу бувкIун бия мудангу жула миллатрал кказитрал чIарав бусса хIурмат ххи­сса хъамал: Лакрал райондалул бакIчи Юсуп МахIаммадов, ДР-лул ХIукуматрал ва БакIчинал администрациялул комиссиялул советник Шалласу Шалласуев, ДР-лул Жяматийсса палаталул хъунаманал хъиривчу Ссапарбаг Аьбдуллаев, ххуй-ххуйсса къуллугъирттай зий ивкIсса хъуначу МахIаммад Айдаев, Дагъусттаннал политех колледжрал директор ХIасан Аьбдуллаев, Лакрал райондалул КIулшиву дулаврил управлениялул хъунама Явсупа ХIамзаев, МахIачкъалаллал ччатI шахьай заводрал хъунама Сайпуллагь Аьвдуразакьов, Кировуллал райадминистрациялул отделданул хъунама ХIасан-ХIусайн Камалов, МСЭК-рал хирург Султан ЦIаххаев, предприниматель Гулшан Хасаева ва цаймигу.

[dropcap]Б[/dropcap]увкIуна мукунма мудангу жулва кказитрал дуллалисса мероприятиярттай чIявуну гьуртту шайсса дусталгу: Журналистътурал союзрал хъунама Аьли Камалов ва Кказит-журналлу итабакьайсса типографиялул хъунама УмархIусман ХIажиев.
Хъамал ихтилатру буллай бия лакку маз ябаврил ххуллий, миллатрал рувхIанийсса ирс-ххазина буруччаврил ялув кказитрал хъинну агьамсса даву дуллай бушиврия, чIявуми лак шагьрурдай бухьувкун, хIакьинусса кьини цайми миллатирттал мазурдийннияргу захIматсса кьини лакку мазрайх дурккун душиву, «Илчи» хIакьину хIисав хъанай бушиву лакрал дякюруну, миллатрайн багьайсса цумур-цагу масъалартту гьаз бай­сса ххал бигьайсса кIанттуну, ккурчIану.
Мажлис исвагьийгу, чIю­лугу бувна ХIажиаьли ХIажи­аьлиевлул ва Шагьалай МахIам­мадовал щаллу бувсса лакку балайрдал.