Ноябрьданул 7-нний 100 шин хьуссар Аьрасатнал ва Дагъус­ттаннал халкьуннал артистуран, циркрал династиярдал гьанурду бивзсса, бусалардавун багьсса пагьламантуран – Ярагъи ХIажикьурбановлун ва Рабадан Абакаровлун.

ПатIимат Рамазанова
Ярагъинал ряххилчинмур душнил, Аьрасатнал лайкь хьу­сса артистка Фатима ХIажи­кьурбановал-Медниковал (ванил телефон кIул дунни Москавлив яхъанахъисса цIувкIрачу МахIаммадхIажи Загьидиновлул, барчаллагьри) телефондалувух бувсунни буттал юбилей лахъсса даражалий дуршиву Курск шагьрулул циркрал.
— Циркрал хъуниминнан «Пишалул кьинирду» тIисса проект дуван дакIнийн багьну бия цирк­раву, на «Росгосциркрал» артистка хIисаврай Курскалий бу­ссияв. Тиккусса циркрал хъунмур Наталья Шульгал бувсуна СССР-данул, Аьрасатнал циркрал тарихраву бюхттул­сса даражалийн гьаз хьусса инсантурая бусан дакIний бушиву проектрал лагрулий, дайдихьу ттул буттая дуван ччай бушиву, му бусалардавун агьсса артист уну тIий. Хъинну ххуйну хIадургу хьуну бия коллектив. «Евровидениялий» ххув хьусса ссурвал Толмачевахъая тIайла хьуну, гьунарду ккаккан бунни цIанихсса артистурал. Бувсунни Ярагъи ХIажикьурбановлуя ва мунащал зий бивкIминная. Тамашачитуран бахшишну хьунни 71 шинал оьрмулувусса ттул ссил, Аллал, хьхьуттай шпагат буваву. Буттал ванийн Айшан учайва, ниттил – Алла, вагу Аьра­сатнал лайкь хьусса артисткар, — увкунни Фатимал.
Ва цIанихсса династиялул цIа ядуллай бур хIакьинусса кьинигу. Къабигьасса бур Фатимал оьр­мулул ххуллугу. Ванил лас, цIа ларгсса артист Александр Медников, Американаву гастроллай унува, инсульт хьуну, шанийн агьну ур. Фатимангу, ласнал­сса буллан, даву кьаритан багьну бур. Ва 13 шинава зана хьуну бур хьхьу­ттайн, аьпалухьхьун лавгсса ласнал ва цилва номер цIу буккан буван. Фатима 1983 шинал, Аьрасатнал халкьуннал артистка Алла Пугачева «Пагьламан душ» тIисса балай тIутIиний, хьхьуттай къавтIий дакIний буссар хъунмур никирал агьлулун. Мукунма машгьурсса балайчи Валерий Леонтьевлущалгу бувкссар сахIналийн. Ласнащал ва Изольда тIимур ссищал ва бивссар чIявусса билаятирттайн, киносуратравугу буссар, вайннал «Леки» тIисса трюкрал дунияллийцири тамашачитал хIайран бувссар. Ванил «Илчилул» бу­ккултрахь бусанмур чIявур. Икьрал дуварду утти на Москавлив лавгсса чIумал хьунабакьин. ИншаАллагь!