[dropcap]А[/dropcap]рвахIкьини Дагъусттаннал БакIчиначIасса Хъунисриннал советрал сакиншиндаралу ХIукуматрал къатраву хьунни республикалийсса хIачIай щинал тагьардануцIун, масъаларттацIун дархIусса батIаву. Ши­кку советрал вакилтал бакъасса, мукунма гьуртту хьунни республикалул къуллугъирттал каялувчитал, ДР-лул ХIукуматрал председательнал хъиривчу ХIасан Идрисов ва ДР-лул строительствалул, архитектуралул ва ЖКХ-лул министр Ибрагьим Казибеков.

З. АьбдурахIманова
[dropcap]Б[/dropcap]атIаву тIитIлай, Хъунисриннал советрал каялувчи Аьбдулла МахIаммадовлул кIицI лавгунни, уттигъанну республикалул чIумуйнусса бакIчи Владимир ВасильевлучIа хьусса хьунабакьаврий цахь тавакъю бувшиву Совет­рал вакилтурал дяниву, хасъсса къуллугъирттайнгу оьвкуну, хIачIай щинал масъала ххал бигьин.
«Владимир Аьбдуаьлиевичлул бусаврийну, ганачIансса агьалинаясса чIявуми аьрзри хIачIай щиная къарязишивриясса бур. Жунмагу кIулли жула жяматрал хIачIайсса щинал тагьар хъинну къаххуйсса душиву. Жула хIакьинусса мурадгу республикалул шагьрурдай, районнай ва масъалалул хъирив лавну, ххал бивгьуну, бакIчинал хьхьичIун ласунсса хIукму кьамул бавур», — увкунни Аь. МахIаммадовлул.
МахIачкъалалив хIачIай щиная халкь къарязийну бухьурча, рес­публикалул цаппара кIанттурдай дурарагу щин диял къахъана­хъисса ишру чIявусса бур. Масалдаран, Буйнакскаллал халкьуннал ацIрахъул шиннардийсса «цIуцIи кIанур» щин диял къахъанахъимур масъала. Лахъми зивурдайн гьантлун ца-кIира ссятрай дакъа щин гьаз къашайссар.
2016 шинал январьданул 1-ннин республикалий щинал объектирдан итадаркьуну дур 5063, 39 миллион арцул. Миннува 3015,61 миллион арцул бур федрал бюджетрава, 1683,73 миллион – республикалул бюджет­рава. 304,05 миллион арцул ялун бувкIун бур бюджетравун къабагьайсса кIанттурдава. Вайннува итадаркьусса арцух МахIачкъалалия ва Каспийскалия нанисса канализация дуллалисса давуртту щаллу дурну дур. Аьрщарал вивух нанисса ва канализациялул лахъишиву аьмну 14,8 км. дусса дур. Канализация даврийну чан хьунтIиссар Каспий хьхьиривун нанисса Каспийскалиясса чапалсса щинну.
Аьбдулла МахIаммадовлул Роспотребнадзорданул каялувшиндарахь тавакъю бувунни ччя­сса мутталий шагьрулийсса хIачIай щинал масъала ххал бивгьуну, хIадуршинна дуван.
И. Казибековлулгу бувсунни республикалий щинал объектру дуллалисса давурттая.
БатIаврил ахирданий Советрал вакилтурал къуллугъирттал каялувчитурахьхьун цаймигу суаллу буллунни.